Espíritu 28 Novembru! Vong Husu Jovens Estuda, Respeitu Malu & Halo Asaun
Imajem : Prezidente Eleitu KAGaMa-TL Manuel Vong iha salaun DIT, Sabadu 22/11/2025.
SAPNewsTL, Dili : Komemorasaun proklamasaun independénsia ba dala-50, Prezidente eleitu Klibur Alumi GadjahMada (KAGaMa) Manuel Vong hateten, nia sente orgullu Timor-Leste sai país independénte no hakarak dezenvolve nasaun sai justu no prósperu.
Marciana da Conceição – SAPNewsTL
“Tinan lima-nulu (50) liu-ba ha’u sei joven los no kolega balu seidauk moris tan, ami hotu liu-husi reflesaun diskusoens ne’ebé maka iha hotu-hotu hare’e katak orgullu hanesan pais independénte”.
“Ami konsiente hodi bele hatutan lider nasionál no erói da patria sira nia mehi no patriotizmu hodi bele husik hela ba ita katak hakarak dezenvolve Timor ida-ne’ebé independénte, justu no prosperu ba ema hotu”. Dehan Prezidente eleitu KAGaMa Manuel Vong ba SAPNews iha salaun DIT, Sabadu 22/11/2025.
Prezidente Manuel Vong parabeniza povu Timor-Leste no sente orgullu hodi fó onra ba erói patria. Nu’udar jerasaun kontinuador tenke aposta iha edukasaun no kapasita aan hodi servi nasaun no povu.
“Parabéns ba Timor-Leste no ba povu tomak, ita orgullu fo onra ba erói da patria sira maibe hanesan joven no jerasaun kontinuador labele haluha aposta iha edukasaun, komitmentu iha integridade, dezenvole ita-nia matenek hodi servi”.
“KAGaMa laos hamrik ba nia aan deit maibe hamrik ba sosiedade no povu, tanba ida-ne’e ba joven sira aposta iha edukasaun. Fó imi nia tempu atu estuda, estuda iha imi-nia eskola, uma no sosiedade tanba ho estudu no matenek nu’udar kapital intelektual ne’ebe sei la hotu”. Nia subliña
Nia husu joven sira hodi hametin karakter empreendedorizmu iha moris, rona no hatene maibe tenke iha asaun.
“Joven sira nafatin hametin imi-nia karakter empreendedorizmu iha moris, rona no hatene maibe tenke halo. karakter espiritual tenke kuda iha ita-nia fuan no laran katak ita halo maka bele hetan moris diak ba rai ida-ne’e”.
“Hametin relasaun sosial ne’ebe iha, hadomi malu no tulun malu ne’e importante no ikus liu tenke iha respeitu no responsabilidade”.
Manuel Vong espera KAGaMa Timor-Leste laos deit eziste ho legalidade no lezitimidade maibe oinsa bele iha asaun konkreta ba sosiedade.
“Ita hein katak KAGaMa Timor-Leste laos deit atu sai hanesan organizasaun ne’ebé maka hari’i ho deit ninia ezistensia legalidade no lezitimidade maibe importante liu maka iha asaun konkreta ba ita nia sosiedade”.