MAE Husu Povu Partisipa 28 Novembru, Haree Resultadu Servisu Kada Munisipiu
Imajem : Abertura Expozisaun Nasional komemorasaun proklamasaun 28 Novembru ba dala 50 iha Tasi-Tolu, 24/11/2025
SAPNewsTL, Díli : Xefi Estadu José Ramos-Horta, hamutuk ho membru governu sira, ofisialmente halo ona abertura ba Expozisaun Dezenvolvimentu Governasaun Lokál no Feira Nasionál, no husu povo tomak partisipa hodi komemora momentu istóriku tinan 50 Proklamasaun Unilaterál Independénsia Repúblika Demokrátika Timor-Leste (RDTL).
Guilhermino Ramos & Daniel Silva – SAPNewsTL
Iha intervensaun, Ministru Administrasaun Estatal (MAE), Aktual Prezidente Komisaun Organizadora, Tomás do Rosário Cabral hateten, atividade ba komemorasaun dias nasionais 28 novembru hahu iha loron tolu fulan novembru no ohin kontinua ho abertura ba Expozisaun Dezenvolvimentu Governasaun Lokál no Feira Nasionál ne’ebe hahu realiza husi loron 24 to’o loron 29 fulan novembru tinan 2025.
“Nu’udar Ministru Administrasaun Estatal ne’ebé asumi mós responsabilidade hanesan Prezidente Komisaun hakarak hato’o katak aktividade sira ne’e ita hahu iha dia 03 de Novembru ne’ebe mak hala’o kompetisaun jogu amizade entre linha ministeriais sira” Dehan MAE Tomás Cabral liu husi nia intervensaun iha, Tasi-tolu, Segunda-Feira, (24/11/2025)
Prezidente Komisaun Organizadora ba eventu komemorativu 28 novembru ne’e fundamenta, nia parte husu ba povu tomak atu hola parte iha momentu istoriku ida ne’e, tanba liu husi despaixu Primeiru-Ministru Kay Rala Xanana Gusmão nian, orienta membru governu sira tun ba munisípiu 13 inklui RAEOA.
“Nu’udar Prezidente Komisaun Organizadora, hakarak konvida ita hotu ne’ebe iha fatin ne’e, nomos ba maluk sira ne’ebé iha hela uma maibe asiste mós tranzmisaun direta ne’e, atu bele partisipa mós iha atividade sira ne’ebe mak ohin aprezenta iha leten. Konvida Ita hotu atu ba koñese sa rezultadu servisu mak Munisípiu ida-idak halo ona to’o ohin loron”.
Ministru hatutan, tinan ne’e nu’udar tinan istoriku ne’ebe heroiku sira husik hela durante dekada lima ona, nune’e povu Timor-Leste hanoin hikas fali Independénsia Unilaterál ne’ebé proklama iha loron 28 Novembru 1975.
“Entaun iha tinan ida ne’e, ita selebra tinan 50 ho tema, Que a celebração destes 50 anos, do passado, nos assegure confiança no presente e esperança no futuro, signifika momentu ne’ebe mak munisípiu sira prepara hela sira-nia an atu kompete ba Poder Lokál” Tenik Ministru.
Komemorasaun 28 Novembru iha tinan ida ne’e, Komisaun Organizadora hahu kedas ho abertura atividade kompetisaun jogu futsal ne’ebe hala’o iha loron tolu (3) semana dahuluk fulan novembru, no sei termina iha loron 29 novembru 2025 ho atividade enseramentu expozisaun governasaun lokál nian iha Tasi-Tolu.
Tomás Cabral dehan, kompleta ba komemorasaun loron nasionál ne’e, iha mós talk show ne’ebe realiza husi RTTL-EP halo intervista ho Prezidente Repúblika, inklui iha misa agradesimentu ne’ebé selebra iha igreja katedral iha loron 27 Novembru tuku 9 dader no kontinua kedas fó omenajem ba Heroi da Patria, ne’ebé mak simbolikamente sei lori ai-funan ba Monumentu Nain-Feto iha Lesidere. Autoridade Munisípiu Dili ho nia estrutura sira mak sei organiza Misa iha Jardim dos Herois Metinaro no kontinua kari aifunan iha ne’ebá.
“Ba Korpu Diplomatiku sira, Ajensia Internasional sira, aproveita tempu iha espozisaun ne’e, bele dada lia ho ita-nia autoridade lokál sira kona-ba atividade balun ne’ebe mak ita bo’ot sira apoia ou finansia hela iha sira-nia munisípiu”.
Aleinde ne’e Ministru Administrasaun Estatál mós hato’o agradesimentu ba Prezidente Republika, tanba bele halo abertura ba Expozisaun Dezenvolvimentu Governasaun Lokál no Feira Nasionálm
“Ha’u agradese ba Prezidente Repúblika ne’ebé mak maske kolen tamba viajen dook, maibé bele mai hola parte iha eventu ohin loraik Abertura Expozisaun Dezenvolvimentu Governasaun Lokal iha prasa tasi tolu”.
Ministru mós informa tan katak, iha loron 28 Novembru mak sei iha serimónia isár Bandeira Nasionál iha resintu Palásiu Governu. Isár Bandeira sei hahu tuku 8 dader no Areiar Bandeira sei hahu tuku 5 lokraik oras Timor-Leste (OTL).
Aleinde expozisaun no jogu futsal iha mós kompetisaun dansa tradisional, kompetisaun ba espozisaun dezenvolvimentu governasaun lokál no animasaun husi grupu dansa no banda muzika ne’ebe sei aprezenta husi Munisípiu 12 no Autoridade Administrativa Ataúro.
Nune’e mós iha prasa Tasi-Tolu nian, iha mós atividade kulinária no artezenatu ne’ebé mak partisipa husi grupu hamutuk 150. Grupu hirak ne’e mai husi grupu produtores industrializasaun no grupu lokál kulinária no artezenatu nian, ne’ebé mak atu lori mós sira nia produtu mai iha expozisaun ne’e.
Entretantu, iha serimonia abertura expozisaun ne’e partisipa husi Prezidente Republika, Prezidente Tribunal Rekursu, Deputadu, Membru Governu, Korpu Diplomátiku, Reprezentante Ajensia Internasional iha TL, Reprezentante Konfisaun Relijiozu, Autoridade Sivil no Militar, Instituisaun Autonomu Estadu nian, Veteranu, Autoridade Munisipal sira, Setór Privadu sira, Autoridade Lokal sira, partisipante feira husi grupu oioin no konvidadu sira hotu.