Sertifika Formandu 166 ! Expedito : “Kualidade Ema Nian La Haree Husi Sertifikadu”
Imajem : SEKomS Expedito Dias Ximenes iha Díli, 25/11/2025
SAPNewsTL, Díli : Sekretáriu Estadu Komunikasaun Sosiál (SEComS sigla Portugués), hamutuk ho Prezidenti Komisaun Funsaun Publika (CFP), Agostino Letencio de Deus ofisialmente atribui sertifikadu apresiasaun ba formandu nivel nasional (166) ne’ebe remata ona prosesu aprendizajen no estajiu profisional durante fulan tolu.
Guilhermino Ramos da Cruz – SAPNewsTL
Iha diskursu Sekretáriu Estadu Komunikasaun Sosiál, Expedito Loro Dias Ximenes hateten, avaliasaun kualidade profisionál la’ós bazeia de’it ba sertifikadu formal, maibé depende fortemente ba evidensia pratika no desempenho konsekuente iha instituisaun. Nune’e, kualidade servisu loron-loron mak sai indikadór prinsipál kona-ba kapasidade no integridade profisionál.
“Kualidade ema nian la haree husi sertifikadu, maibé haree husi prátika iha instituisaun, entaun kualidade ita boot sira nian termina husi ita bo’ot sira-nia servisu loron-loron” Dehan Sekretáriu Estadu Expedito Loro Dias, Iha Salaun MTC, Rerkadu Lama, Tersa-feira, (25/11/2025)
Governante ne’e afirma, objetivu husi formasaun mak nonu governu konstituisional kontinua kapasita foinsa’e sira iha area Multimedia, Televizaun, Hakerek Imprensa, Radio, Protokolu no Komunikasaun Jestaun Krize, nune’e bele forma foinsa’e sira sai rekursu umanu ne’ebe kualidade no kompetitivu iha mundu digitalizasaun.
Iha fatin hanesan, Diretor Diresaun Nasionál Formasaun Teknika no Komunikasaun ( Sigla DNFTC), Julio Lopes afirma, governu kontinua mentaliza foinsa’e sira, nune’e nia parte husu ba formandu/a sira atu kontinua hadia abilidade komunikasaun iha servisu fatin, hodi kontribui ba progresu iha instituisaun públiku no privadu sira.
“Iha nivel nasional, ohin ita bo’ot sira simu sertifikadu ne’ebe atribui husi DNFTC ho ida ne’e atu dehan ba graduada sira katak husi espasu ida ne’e oinsa mak ita bo’ot sira bele kapasita an liu husi abilidade no profisionál diak liu tan hodi asegura servisu balun iha liña ministerial sira ne’ebe ligasaun ho area Komunikasaun Sosiál”.
Diretor DNFTC salienta, Iha 2025 liu-husi esforsu maka’as Sekretáriu Estadu Komunikasaun Sosiál konsege halo mudansa ba Centru Formasaun CEFTEC nakfilak ba Diresaun Nasionál Formasaun Teknika no Komunikasaun, bazeia ba dekretu-lei numeru 5/2025 hodi kontinua fasilita formasaun ba maluk timoroan sira iha nivel nasional no nivel munisípiu, sira hanesan Manatuto, Viqueque, Liquiça no Aileu.
“Iha tinan ida ne’e ita-nia tema ba serimónia atribuisaun sertifikadu mak, Hakbiit Abilidade Profisionál, Asegura Efetividade Institusional, nune’e DNFTC iha unidade formasaun hitu (7) kompostu husi Unidade Formasaun Komunikasaun Lian Tetun Jornalizmu, Unidade Multimédia, Unidade Rádiu, Unidade Televizaun, Unidade Komunikasaun Relasaun Públika no Protokolu, Unidade
Hakerek Imprensa no Unidade Formasaun
Jestaun Komunikasaun iha Situasaun Krize”.
Enkuantu, formasaun kualifikasaun nasionál ba tinan 2025, DNFTC prodús total formadu 166, kompostu husi formandu mane 79 no feto 87. Husi númeru ne’e, funsionariu publiku 110, jornalista ida (1) no estudante finalista universitáriu nain 55.
Tuir dadus DNFTC nian katak, totál formadu ba formasaun nível nasionál hosi unidade formasaun Komunikasaun Relasaun Públika no Servisu Protokolu hamutuk ema na’in 33, Multimédia ema nain 26, Hakerek Imprensa ema nain 30, Televizaun ema nain 19, Lian Tetun Jornalizmu ema nain 24, Rádiu 11 no Unidade Jestaun Komunikasaun iha Situasaun Krize ema nain 23.
Serimónia atribuisaun sertifikadu ne`e dedikadu ba formadu sira ne’ebé tuir ona formasaun ho karakter kualifikasaun nasional ho kompeténsia Téknika Komunikasaun Nível I- IV, ho karga oráriu formasaun oras 300 – 1200, tanba tuir regulamentu DNFTC, formandu sira kualifikasaun nasional ne’ebe la’os funsionáriu públiku no ajente administrasaun públika tenki kompleta ho estájiu profisionál fulan ida iha
instituisaun estadu nian no media privadu sira iha Timor.
Entretantu, iha serimónia atribuisaun sertifikadu ne’e partisipa husi, Sekretáriu Estadu Komunikasaun Sosiál, Expedito Loro Dias, Prezidenti Komisaun Funsaun Publika, Agostino Letencio de Deus, Reprezentante Diretora Ezekutiva INDIMO, Isabel de Lima Fernandes, kargus diretores nasionais, ho funsionáriu SEComS no formandu 166.