Wainhira Hasoru Papa! PR Horta Preokupa “Mundu Ne’ebe Namlele & Ema Kiak”.

Imajem : Papa Leão XIV & Presidente Repúblika José Manuel Ramos-Horta iha Vaticano, 21/11/2025. Foto : Vatican News

SAPNewsTL, Díli : Presidente Republika(PR), Jose Ramos Horta sublinha, wainhira audiênsia ho Papa Leão XIV “ami ko’alia kona-ba mundu ida ne’ebé namlele, ema sira ne’ebé kiak liu, labarik sira ne’ebé laiha edukasaun, bee-moos no seguransa ai-han”.

Iha diskursu xefe estadu Jose Ramos Horta preokupa kle’an kona-ba situasaun mundu nian liliu tragédia ne’ebe akontese iha Gaza, West Bank, Ukránia, Síria, Repúblika Demokrátika Kongo, Iémen, Sudaun no Myanmar.

“Trajédia sira ne’ebé maka persiste iha

Gaza, West Bank, Ukránia, Síria, Repúblika Demokrátika Kongo, Iémen, Sudaun no Myanmar maka xamada urjente ida ba konxiénsia umana, sofrimentu husi ema millaun resin, liuliu feto no labarik sira, ezije indignasaun, solidariedade no asaun husi ita hotu”. Teni Presidente Republika Demokrátika Timor-Leste Jose Ramos Horta iha nia diskursu, Palásiu Governu, sesta-feira, 28/11/2025.

Iha Janeiru 2024, bainhira ko’alia ho Papa Francisco iha Roma, “ha’u manifesta ha’u-nia deziluzaun ho indiferensa no ipokrizia globál krime sira hasoru umanidade. Santu Padre hatán ho liafuan ne’ebé importante to’o ohin loron.

“Ita tenke kontinua luta ba dame, Amu-Papa Francisco nia vizita istórika mai Timor-Leste iha fulan-setembru 2024 sai hanesan marku emosionál no espirituál ida ba ita-nia povu”.

Ema rihun atus hitu selebra, reza, hananu no tanis. Iha aeroportu, Santo Padre kaer “ha’u nia liman hodi dehan, kuidadu didi’ak povu furak ida ne’e” Jestu simples ida, maibé nakonu ho signifikadu, ne’ebé sei grava ba nafatin iha ita hotu nia memória, nu’udar símbolu fiar, esperansa no perseveransa ita-nia povu nian.

Iha dadeer loron 21 fulan-novembru tinan 2025, ha’u simu iha audiénsia hosi Sua Santidade Amu-Papa Leão XIV, iha Palásiu Apostóliku, iha Santa Sé.Delegasaun Prezidensiál ne’ebé kompostu hosi reprezentante sira hosi governu no sosiedade sivíl, inklui Tia doben Sofia (Vendedór Ai-Lebas), símbolu povu Timor-Leste ne’ebé haraik-an no badinas.

Ama Sofia nia prezensa iha delegasaun simboliza konviksaun katak dezenvolvimentu no reprezentasaun tenke to’o iha sosiedade nia nivel hotu-hotu, liuliu lian sira ne’ebé haraik-an liu, feto no traballadór sira ne’ebé loroloron hari’i ita-nia nasaun.

Amu-Papa Leão XIV elojia inisiativa ida-ne’e, hodi fó hanoin katak justisa loloos no progresu umanu harii iha inkluzaun no kuidadu ba sira ne’ebé vulneravel liu.

“Ami simu ho onra aas liu hosi Guarda Suisa Pontifísia no Dignitáriu Aas sira Santa Sé nian”, enkontru ne’e nakonu ho emosaun no signifikadu iha Bazílika São Pedro nia fuan, “ami ko’alia kona-ba mundu ida ne’ebé namlele, kona-ba ema sira ne’ebé kiak liu no vulneravel liu, kona-ba labarik sira ne’ebé laiha edukasaun, bee-moos no seguransa ai-han”.

Durante audiénsia, iha oportunidade atu atualiza ba Santu Padre kona-ba progresu sosiál no ekonómiku ita-nia rain nian, konsolidasaun demokrasia, hadi’a edukasaun, saúde no infraestrutura liuliu kona-ba ita-nia adezaun istórika ba ASEAN, ne’ebé ho responsabilidade no konstrutiva integra ita iha paizajen rejionál Sudeste Aziátiku nian.

Xefe estadu hatete hanesan ita sente emosionadu ho Papa Francisco nia vizita istórika mai Timor-Leste, ohin, ho audiénsia Sua Santidade Papa Leão XIV nian, ita hanoin hikas katak mundu hare’e hela ita, katak valór sira fiar nian, dame no solidariedade nian mak universál, katak ita-nia misaun nu’udar nasaun mak kontinua hari’i ponte sira, inspira esperansa no hametin dignidade umana.

“Ita espera katak loron ida-ne’e bele reafirma-nia kompromisu ba ita-nia povu nia liberdade, unidade, dezenvolvimentu no dignidade”.

Espera katak ita-nia Eroi sira-nia ezemplu bele inspira Timoroan ida-idak atu kontribui, ho serbisu no determinasaun, hodi harii Timor-Leste ida ne’ebé prósperu, modernu no respeitadu iha mundu.

Ba família sira ne’ebé sai nu’udar aliserse ba ita-nia sosiedade, ba komunidade lokál sira ne’ebé hametin ita-nia espíritu solidariedade nian, ba diáspora Timor-oan ne’ebé lori Timor-Leste nia naran hale’u fronteira sira, no ba ita-nia Povu tomak.

“Ha’u husik hela mensajen unidade no esperansa nian, mai ita kontinua hamutuk, prezerva ita-nia identidade, promove ita-nia kultura no haree oportunidade sira ne’ebé asegura futuru jerasaun sira tuirmai”.