15 Dezembru, Veteranu Hamutuk Rihun 43 Sei Simu Pensaun Hosi Governu

Imagen : Ministru Asuntu Kombatente Libertasaun Nasionál Gil da Costa Monteiro “Oan Soru”. Foto : Média MACLN

SAP News TL, Díli : Ministru Asuntu Kombatente Libertasaun Nasional (MAKLN) Gil da Costa “Oan Soru” deklara sobrevivente hamutuk rihun haatnulu resin tolu (43.000 liu) sei simu pensaun veteranu hosi governu iha loron 15 fulan Dezembru 2025.

Marciana da Conceição – SAPNewsTL

Ministru bá Asuntus Kombatentes Libertasaun Nasionál (MAKLN), Gil da Costa Monteiro “Oan Soru”, hato’o informasaun ne’e liu hosi konferensia imprensa ne’ebe hala’o iha gabinete MAKLN Comoro, 04 Dezembru 2025.

IX Governu Konstitusionál liuhosi Ministériu bá Asuntus Kombatentes Libertasaun Nasionál (MAKLN), kalendariza ona atu halo pagamentu pensaun Veteranus nian bá Kombatente sira hamutuk na’in atus-neen (600) resin iha faze da-huluk nian iha loron 15 fulan-Dezembru tinan 2025.

Kombatente sira ne’ebé atu hahú simu pensaun iha fulan-ida ne’e mai hosi sira ne’ebé mak rejistadu iha segundu rejístu tinan 2009 nian, inklui sira ne’ebé ninia dadus pendente kedas iha primeiru-rejístu 2003 no 2005.

“Oan Soru” esplika, sira ne’ebé atu hetan dadauk pagamentu hosi governu iha fulan ida-ne’e, inklui grau partisipasaun (3-7), (8-14), (15-19), (20-24) ho Mártir sira ne’ebé mak mate ho idade klosan durante funu bá libertasaun nasionál hahú hosi tinan 1975 to’o 1999.

“Ema mate klosan ne’e barak liu. Maibé, agora dadauk, iha ema atus-ida (100) resin mak agora dadauk tama hotu iha pensaun ne’ebé foin dadauk ita aplika bá. Maibé, ami hein tán iha loron hirak ne’e, tanba lísta ne’e lori bá taka sai hela, no ami halo hela kálkulu. Sé ida ne’e mai hotu, hamutuk atus-neen (600) resin. Atus-neen resin ne’e mak sei paga iha fulan-dezembru tinan ida-ne’e,” Ministru “Oan Soru” informa liuhosi konferénsia imprénsa iha kna’ar fatin, Comoro-Dili, Kinta (04/12/2025).

Tuir dadus, ema sira ne’ebé durante ne’e simu hela pensaun, inklui dadus sira iha segundu-rejístu 2009 nian hamutuk rihun 43. Dadus ida-ne’e inklui pensaun oioin mak hanesan, balu sei hetan pensaun Vetaranu ho tinan 24, balu 15/19, no barak liu mak simu pensaun 8/14 ho pensaun sobrevivénsia.

“Iha ne’e mós iha Prestasaun Pekuniária únika ne’ebé mak hanesan ohin mensiona iha ne’e, hamutuk 5 mill resin. Ne’e maka sei hetan mós direitu bá pretasaun pekuniária únika ne’e,” relata Ministru “Oan Soru”.

Enkuantu montante osan ne’ebé mak MACLN sei uza hodi halo pagamentu Kombatente sira iha fulan ida-ne’e nia klaran hamutuk Millaun $49. Maibé, hosi millaun $49 ne’e kotegória hanesan brutu, no líkidu ne’e hamutuk milaun $44 resin ($44.294,144,12). Sita 𝐌𝐞𝐝𝐢𝐚 𝐆-𝐌𝐀𝐊𝐋𝐍

Notisia kompletu bele asesu iha link tuir mai :
https://www.facebook.com/SAPNewsTimorLeste/videos/1586053312566681/?mibextid=rS40aB7S9Ucbxw6v