PM Xanana Orienta “Taka Lotaria Gragon” & Ekipa Konjunta Asegura Osan Besik Millaun 1
Imagen : Primeiru-Ministru Kay Rala Xanana Gusmão iha Praia dos Coqueiros, Díli, 04/12/2025. Foto : Média GPM
SAP NewsTL, Díli : Primeiru-Ministru (PM), Kay Rala Xanana Gusmão tun terenu no orienta hodi taka jogu online lotaria Dragon, ekipa konjunta asegura prova ka evidénsia sira, hanesan telemovel 15, kumputadór 10-resin, pasaporte, kupon ho osan kuaze millaun $1 iha brankas, inklui halo identifikasaun bá traballadór balun no halo detensaun bá jerente na’in-tolu.
Prezensa Primeiru-Ministru nian iha terrenu tanba durante debate Projetu Proposta Lei (PPL) no.23/VI (3a) kona-bá Orsamentu Jerál Estadu (OJE) tinan fiskál 2026 iha Parlamentu Nasionál (PN) simu lia-fuan mafiozu, tanba Governu husik jogu online kontinua eziste. Ho ida-ne’e mak Governu halo tiha rezolusaun hodi taka jogu online ne’e, maibé ema sei joga nafatin.
“Ha’u mak responsável bá Servisu Nasionál Intelejénsia (SNI) no PSIK. Sira ne’e iha ha’u-nia okos hodi hatán bá problema sira ne’ebé sosiedade hasai iha Parlamentu lor-loron de’it dehan ha’u mak mafiozu bo’ot, ema lakon osan barak. Tanba ida-ne’e mak mai haree katak, iha-ne’e sei joga nafatin,” PM Xanana Gusmão iha Praia dos Coqueiros, Díli, 04/12/2025. Sita Média GPM
Xefe Governu haree katak, ema sira ne’ebé loke jogu sira ne’e iha ligasaun direta ho Indonézia, Rúsia, Brazíl, Europa. Tanba ne’e maka Polísia mai iha ne’e dezliga de’it maibé iha rezolusaun Governu nian ne’ebé publika ikus ne’e dehan katak sobu.
“Ha’u mai kedan iha ne’e atu fó-hanoin bá hotu-hotu katak iha desizaun dehan taka, la taka maka deskobre sobu hotu, ida-ne’e hosi SNI no PSIK. Ha’u bá Prokuradoria Jerál Repúblika maibé sira la book-an, servisu kala barak tebtebes tanba ne’e mak ha’u rasik mak mai. Nu’udár Xefe Governu bá iha Parlamentu Nasionál ha’u rona lia-fuan barak tebtebes, ha’u senti katak tenke iha desizaun urjente no lalais,” Xanana Gusmão hateten.
Liu-hosi Diresaun Servisu Investigasaun Kriminál (DSIK) iha kuarta (03/12/2025), ezekuta mandadu hosi Ministériu Públiku (MP) halo buska no apreensaun bá jogu Lotaria Grand Dragon neʼebé lokaliza iha Praia dos Coqueiros no mós nia sukursál iha Timor Plaza.
Iha prosesu buska no apreensaun ne’e, PNTL lidera hosi Komandante Operasaun Superintendente Asistente Polísia Mouzinho Tavares Correia, ekipa asegura prova ka evidénsia sira, hanesan telemovel 15, kumputadór 10-resin, pasaporte, kupon ho osan kuaze millaun $1 iha brankas, inklui halo identifikasaun bá traballadór balun no halo detensaun bá jerente na’in-tolu.
Ezekusaun bá buska ne’e hetan mandatu hosi Ministériu Públiku liu-hosi Prokuradór João Marques ho Númeru Uniku Kriminál (NUC, sigla portugés) 0389/2025.PNSIC.
Jogu Grand Dragon Lotaria Estadu Timor-Leste liu-hosi VIII Governu Konstitusionál legaliza iha tinan 2022 no governu dasia taka iha loron 04 Dezembru 2025.