Sosa Mákina Pezadu ! Governu Japaun & JICA Apoiu Osamentu Millaun 3 Ba IGEADI

Imagen : Ministru Negosiu Estranjeiru no Kooperasaun, Bendito dos Santos Freitas ho Embaixadór Japaun iha Timor-Leste, Tetsuya KIMURA iha Salaun Nobre-MNK, Quarte-feira (11/12/2025).

SAPNewsTL, Díli : Asinatura nota ba programa dezenvolvimentu ekonómiku, Governu Timor-Leste husi liu Ministériu Negosiu Estranjeiru no Kooperasaun (sigla, MNEK), hamutuk ho governu Japaun liu husi embaixador Japaun iha Timor-Leste ho JICA apoiu millaun 3, hodi sosa makina pezada ba Ministériu Obras Publika.

Vise Ministro das infraestruturas Julio do Carmo, hateten troka de nota ne’e hanesan kooperasaun administrativa entre governu Timor-Leste no governu Japaun ne’ebe hanesan akordu amizade entre nasaun rua, nune’e governu Japaun liu husi embaixada Japaun iha Timor-Leste no JICA ajuda Timor-Leste hodi fornese ekipamentu pezadu ho montante 3 millaun dolar amerikanu.

“Ohin, marka momentu importante ida husi kooperasaun entre governu Timor-Leste no governu Japaun liu husi serimónia asinatura ne’ebe konsidera hanesan akordu amizade, nune’e mos governu Japaun liu husi Embaixada Japaun iha Timor-Leste no JICA kontinua apoiu Timor-Leste hodi fornese ekipamentu pessadu ba Konstrusaun estrada ho valor kuaze millaun tolu (3) dollares Amerikanu” Dehan Vise Ministro das infraestruturas Julio do Carmo, iha nia diskursu iha Salaun Nobre-MNK, Quarte-feira (11/12/2025).

Vice Ministru ne’e hatutan doasaun ne’ebe oferese husi governu Japaun, sei halo kman servisu obras, nune’e ekipamentu sira sei uza haleu Timor laran hodi asegura dalan ne’ebe seguru iha tempu udan.

“Apoiu ne’ebe governu Japaun liu husi JICA ne’e, hakmaan ona servisu balu iha ministériu das obras publika nian, tanba ita bo’ot sira bele hare katak maioria teritoriu Timor-Leste laran tomak presiza tebes ita hotu nia atensaun liu-liu iha tempu udan ne’ebe besik dadaun ona mai”.

Iha fatin hanesan, embaixador Japaun iha Timor-Leste, Tetsuya KIMURA, haktuir serimónia asinatura ba programa Dezenvolvimentu Ekonómiku no Sosiál ne’e importante tamba bele hasa’e IGEADI nia kapasidade ba intervensaun rapidas no efetivu.

“Ohin marka ida tan iha amizade no kooperasaun duradoura entre Japaun no Timor-Leste. Ita iha ne’e atu formaliza Troca de Notas kona-ba Programa Dezenvolvimentu Ekonómiku no Sosiál, liu husi projetu foun ne’e, Governu Japaun ho JICA sei fó subsídiu maizumenus liu millaun 3 Dollar Amerikanu hodi sosa mákina pezadu, inklui fresadora (makina tesi asfalt) no estabilizadóra estrada”.

Embaixador ne’e salienta liuhusi fornese mákina avansada sira-ne’e, sira hakarak hasa’e IGEADI nia kapasidade ba intervensaun rapidas no efetivu iha preparasaun no resposta ba dezastre sira.

“Mákina pezadu, inklui fresadora (makina tesi asfalt) ne’e sei uza ba projetu pilotu konstrusaun estrada, ne’ebé lori ba asesibilidade ne’ebé di’ak liután iha nasaun tomak, no estimula dezenvolvimentu ekonómiku iha Timor-Leste tomak”.

Enkuantu, asinatura nota ba programa dezenvolvimentu ekonómiku ne’e, liu husi Ministru Negosiu Estranjeiru no Kooperasaun, Bendito dos Santos Freitas ho Embaixadór Japaun iha Timor-Leste, Tetsuya KIMURA ne’ebe partisipa husi Vise Ministru das infraestrutura Julio do Carmo, Presidente IGEADI, JICA, Presidente Be’e Timor-Leste.