Halo Reflexaun 7 Dezembru ! Banaira : “Istória Importante Ba Jerasaun Foun”
Imagen : Xefe Komisaun Organizador Manuel Banaira Gama iha Lautém 7/12/2025.
SAPNewsTL, Lautém : Veteranu Ponta-Leste Munisípiu Lautém halo reflesaun ba loron istóriku 7 Dezembru, Xefe Komisaun Organizador Manuel Banaira Gama hateten reflesaun ne’e importante tebes tanba fanun jerasaun foun sira hodi hatene kona-ba istoria pasadu no hateke ba futuru.
”Objetivu husi reflesaun ida ne’e atu relembra fila fali loron istoriku ne’ebé ema hotu haluha liuliu iha loron importante ida ne’e tanba ne’e ita tenke fo hanoin ba jerasaun foun katak 7 Dezembru ne’e nu’udar loron importante ne’ebé Indonézia mai invade Timor-Leste”. Dehan Komisaun Organizador Manuel Banaira Gama ba Sapnews Pro iha Lautém 7/12/2025.
Manuel Banaira husu ba guvernu hodi labele fó deit feriadu nasional ba estudante, funsionariu no entidade sira hotu maibe tenke halo reflesaun no tau importasia ba loron istoriku refere.
”Nu’udar juventude ne’ebé kontribui oituan ba luta independensia, ami iha prespetiva katak nafatin proteje istória ida ne’e no ba oin governu labele fo de’it feriadu nasionál ba estudante, funsionariu no ba entidade sira hotu maibé tenke halo mós reflesaun no tau netik importansia ba loron istóriku ida ne’e”.
”Ami sempre divulga buat sira ne’ebé relasaun ho istória Timor-Leste nian tanba liu husi reflesaun ida ne’e atu ita hanoin nafatin saida mak akontese tinan 50 liu ba kotuk iha prosesu ne’ebé todan, ikus mai ita konsege duni hetan independensia totál, ba oin presiza motiva malu nafatin, nune’e istória ne’e labele lakon tanba istória importante ba jerasaun foun no hateke ba dook liutan”. Nia salienta.
Iha fatin hanesan, reprezentante joven Lautém Manuel Correia dos Santos hateten, nia parte sente orgullu hanesan jerasaun foun ne’ebe hakarak halo reflesaun ba loron ne’ebe nasaun Indonezia mai invade Timor-Leste, iha ne’ebe povu Timor luta hodi ita bele sente nasaun ida independente.
“Ha’u sente orgullu tanba nu’udar jerasaun foun hakarak halo reflesaun ba loron invazaun 7 Dezembru ba dala 50 tanba jerasaun dahuluk no jerasaun daruak luta ba libertasaun ida ne’e, maka to’o ohin, ita bele aproveita oportunidade hodi sente katak ne’e mak independensia loloos”.
Nia hatutan, ”Istória 7 Dezembru importante tebes ba ita jerasaun foun sira tanba istória hirak ne’e sai hanesan lalenok ida ba jerasaun foun hodi la’o tuir nafatin prinsipiu ne’ebé ita nia aswain sira husik hela mai ita”.
Joven potensial ne’e mós husu ba joven territóriu laran tomak liuliu iha Munisípiu Lautém atu la’o tuir nafatin aswain sira-nia prinsipiu ne’ebé iha to’o agora ita hetan libertasaun.
Serimonia reflexão ne’e hetan partisipasaun maksimu hosi veteranu sira, família mártires sira no komunidade sira sira iha postu Lautem, munisipiu Lautem.