Hakbit Grupu Kooperativu ! P-FM Halo Asaun Karitativa Ba Militante Sira Iha Lautém
Imajem : Vise-Prezidente Partidu Manuel Banaira Gama iha Daudere, 18/12/2025
SAPNewsTL, Lautém : Partidu Frente Mudansa (P-FM) halo asaun karidade ba militante sira iha Suku Serelau no Daudere, Postu-administrativu Lautém, Munisípiu Lautém hodi hakbit Grupu kooperativa komunidade hodi simu tinan foun ho haksolok.
Adhany Rapidez – SAPNews Pro
Vise Prezidente Partidu Frente Mudansa Manuel Banaira Gama hateten asaun karidade ne’e ba militante sira no la taka dalan ba sidadaun sira ne’ebe presiza tanba asaun ne’e hodi hakbit povu kiik sira simu tinan foun 2026.
”Objetivu hosi karidade ida ne’e hanesan apoiu kiik ida nu’udar umanu entre partidu ho nia militante, iha munisipiu Lautém, grupu tolu mak hetan apoiu ida ne’e grupu rua husi Postu-Administrativu Lautém no grupu ida husi Postu-Administrativu Luro maibé ami mós la taka dalan ba sira seluk ne’ebé hakarak ami atu apoiu”. Dehan Vise-Prezidente Partidu Manuel Banaira Gama iha Daudere, 18/12/2025
Banaira hatutan grupu rua husi Postu-Administrativu Lautém mak hetan apoia osan ho montante 200 dólar no grupu ida husi Postu-Administrativu Luro mak hetan makina dulas hahán manu nian.
“Ba oin ami nu’udar partidu polítiku sempre apoiu mak ninia ema maibé odamatan nakloke mós ba sira seluk ne’ebé iha inisiativa atu muda nia moris la’os ba militante de’it”. Nia afirma
Benefisiáriu Livio dos Santos sente orgullu no fo agradese ba lideransa partidu tanba bele apoia nia militante maske la hetan asentu iha Parlamentu Nasional.
”Ami sente orgullu no agradese tebes maske Frente Mudansa hanesan partidu kiik, la ukun no la asesu Parlamentu Nasionál maibé ami militante nafatin ho fuan boot ba ami-nia partidu tanba ajuda nafatin ami hanesan militante no povu kiik”.
“Maske partidu kiik la asesu Parlamentu Nasional no Governu maibé ajuda ona ami ho osan no manu hodi hakiak, nune’e ami bele atende ami-nia nesesidade bázika uma-laran, la’os to’o iha ne’e de’it maibé ba militante no povu hotu-hotu ne’ebé mak iha inisiativa atu kria grupu hodi hakiak manu”.Sublinha Livio dos Santos
Koordenador Partidu Frente Mudansa Munisípiu Lautém José da Costa afirma asaun karitativa nu’udar símbolu militânsia no hametin partidu hodi enfrenta eleisaun iha 2028.
”Karidade ne’ebé ami halo ne’e atu hametin nafatin ami-nia relasaun entre militante sira hotu ba futuru hodi hasoru Eleisaun Parlamentár 2028 nian”.
Partidu nia odamatan nakloke nafatin ba ema hotu ne’ebé iha inisiativa rasik atu tama partidu Frente Mudansa “ami prontu ajuda wainhira sira presiza duni tulun husi partidu”.
Reprezentante juventude postu Luro Justino Fernandes sente kontente tanba foin primeira vez simu makina dulas hahán manu nian.
“Ami hakarak agradese tebes tanba durante ami presiza duni makina hirak ne’e maibé ami-nia forsa mak la too atu sosa makina ida ne’e”. Nia dehan
Duarte Pires Perreira hateten kleur la hetan ajuda, tan ne’e sira kria grupu hodi husu apoia Partidu Frente Mudansa
“Ami tuir Partidu Frente Mudansa ne’e hahu husi 2012 to’o mai agora, ami militante ho inisiativa kria grupu kiik ida hodi akumula malu, nune’e ami hamutuk halo proposta ba partidu hodi husu ajuda militante sira iha Aldeia Aelafa, Suku Daudere, Postu-administrativu Lautém Munisípiu Lautém”.Nia konta
Partidu Frente Mudansa sei kontinua ninia asaun karidade hodi hakbit komunidade sira liu hosi kria grupu kooperativu, nune’e bele hadia sira-nia ekonomia família no hasa’e kualidade moris komunidade nian.