Pe. Guilhermino : “Sunu Fugetes Iha Igreja La’os Fatin Los, Ksolok Espiritual Iha Fuan La’os Aparénsia”
Imajem : Padre Guilhermino da Silva iha Igreja Motael, 24/12/2025
SAPNewsTL, Dili: Relasiona ho fugetes sira ne’ebe sempre sunu iha selebrasaun loron bo’ot sira liu-liu sarani sira sunu iha loron natal no tinan foun, Padre Guilhermino da Silva hateten sunu fugetes iha igreja la’os fatin ne’ebe los, ” la hatene uza sasan iha tempu modernu”.
Iha intrevista ho Amo Parokia Santu António Motael Pe. Guilhermino da Silva informa fugetes ne’ebe sunu iha igreja ne’e la’os fatin ne’ebe los.
“Petasan ne’e la’os kultura ida maibe ne’e moda ida ema modernu nian ne’ebe hakarak atu selebra festa ida maibe petasan sira iha igreja ka maluk sira ne’ebe mai missa lori hodi sunu iha igreja ne’e la’os fatin ne’ebe los, la’os fatin ne’ebe sertu”. Dehan Paroku Parokia Santu António ba jornalista SAPNewsTL iha igreja Motael – Dili, 24/12/2025
Padre ne’e hatutan “Ha’u hatene selebrasaun espiritual ne’e la’os selebrasaun profanus sira nian ne’ebe ita halo liu husi sunu paisaun sira
selebrasaun liturjia nian, ne’e ita halo furak liu husi knananuk sira liu hosi ita-nia lian sira uma kreda nian, ne’e duni petasan ita sunu iha igreja ne’e la’os fatin ne’ebe los”. Tuir Amo Parokiia
Padre Parokia Motael ne’e hatutan ema tenke buka aprende hodi halo buat hotu iha fatin ne’ebe los tanba se la halo ida ne’e mak konsidera la hatene uza sasan modernu iha fatin modernu.
“Ha’u hanoin ita iha ne’e buka aprende, hatene halo buat hotu iha kontestu iha fatin ne’ebe serta, se nune’e ita ema ne’ebe la hatene uza sasan ne’ebe modernu iha tempu modernu”. Tenik Padre Guilhermino
Padre Guilhermino haktuir sunu fugetes hatudu selebrasaun ba loron bo’ot sira maibe sunu iha igreja ne’e lalos.
“Tuir ha’u petasan ne’e atu hatudu selebrasaun ida ne’ebe bo’ot atu fo sinal katak ida ne’e ami nia ksolok ami hatudu liu husi petasan sira ne’e, maibe se petasan iha igreja ne’e lalos tanba ksolok espiritual ne’e ksolok iha fuan la’os ksolok iha aparénsia, la’os mós ksolok ne’ebe hatudu ho material sira ne’e”. Nia hakotu
Enkuantu, tuir observasaun Sapnews Pro iha kapital Dili hatudu katak sarani sira sunu fugetes iha tempu kalan, wainhira kalan fugetes sempre tarutu iha fatifatin inklui iha igreza wainhira misa.
Nune’e, Padre Guilhermino da Silva husu ba sarani sira hodi labele sunu fugetes iha ambiente igreja, simu selebra natal no tinan foun ho damen, domin, unidade no hanoin foun iha tinan 2026.
#natal #tinanfoun #fugetes