Evolui Desenvolvimentu Imprensa ! SEKomS Realiza Média Tour Ba Bali
Imajem : Secretário Estado Comunicação Social Expedito Dias Ximenes iha Palácio Governo Dili, 13/01/2026
SAPNews TL, Díli – Sekretariu Estadu Komunikasaun Sosial (SEKomS) Expedito Loro Dias Ximenes, hala’o média tour hamutuk ho Diretor no Xefe Redasaun hamutuk ema na’in sanulu resin rua (12) ba Bali hodi haree desenvolvimentu média no aplika iha Timor-Leste.
Sekretariu Estadu Komunikasaun Sosial Expedito Loro Dias Ximenes hateten, estudu vijita ne’ebe envolve kargu xefia média nasional sira na’in 12 ne’e hodi observa progresu media nian liuliu iha imprensa, radio no jornal hodi aprende no fahe esperiénsia husi Timor-Leste no Bali, Indonesia.
“Atu hare’e desenvolvimentu husi nasaun viziñu sira kona- ba broadcasting, imprensa, rádiu no jornal, karik ita nian avansadu liu ita fahe ba malu, sira mos iha avansadu liu ita bele fahe ba malu”. Dehan Sekretariu Estadu Komunikasaun Sosial Expedito Loro Dias Ximenes iha Palasiu Guvernu 13/01/2026.
Expedito afirma, estudu vijita ne’ebe hala’o iha Bali bele fo referensia tipu formasaun nian hodi aplika ba jornalista sira iha Timor-Leste ho osan “rihun atus rua ne’ebe Primeiru Ministru Kayrala Xamana Gusmão fo ba Konsellu Imprense hodi fasilita formasaun ba jornalista sira”.
“Ita hein katak dirijente media balun husi imprensa audio vizual, jornal no plataforma online dijital sira no lori enerjia favóritu, lori mós tipu formasaun rai seluk nian, nune’e ita bele aplika iha ita-nia rain”. Nia subliña.
Entretantu, media tour ne’e guvernu fo apoiu ba ema sanulu resin-rua (12) husi media imprensa, radiu, plataforma husi televizaun atu bele fortifika koñesimentu media sira iha Timor-leste no Bali, Indonesia.
“Média tour ne’e sei vizita iha Televisaun Bali, Bali post, Podcast iha Bali, Radio Republika Bali iha Indonesia”.
Média tour 2026 ne’ebe organiza hosi SEKomS ne’e durante loron tolu, hahú iha loron 14 to’o 17 fulan Janeiru tinan 2026.