Tinan 21, Ameta Pineira Rai-Henek Apoia Oan Eskola ! Francisco “Buka Osan La Fasil”
Imajem : Traballador Francisco Tilman no Ameta Mota iha Mota Comoro, 19/01/2026
SAPNewsTL, Dili : Pineira rai-henek sai atividade diariu ba traballador Francisco Tilman no Ameta Mota tanba pineira rai-henek bele ajuda nesesidade loron-loron familia nian.
Johanes Estanislau Freitas – SAPNewsTL
Traballador Ameta Mota hateten, nia hahu pineira rai-henek desde 2007 to’o ohin loron tanba laiha servisu seluk ne’ebe nia hetan iha kapital Dili.
“Ha’u pineira rai-henek iha mota Comoro tempu naruk ona, ha’u hahu iha loron sanulu resin-lima fulan setembru tinan rihun rua hitu (15/09/2007)”. Dehan traballador Ameta Mota ba jornalista sira iha Comoro Segunda-feira, loron 19/01/2026.
Traballador ne’e mós hateten, rendimentu ne’ebé nia hetan kada loron hamutuk $15 USD, rendimentu ne’e nia uza hodi ajuda oan sira-nia eskola no sustenta ba necesidade familia nian
“Rendimentu ne’ebé ha’u hetan kada loron hamutuk 15 USD, rendimentu ne’e balun uza ba oan na’in sia (9) ne’ebé eskola no tener uza tubo sosa ba necesidade uma-laran”. I see.
Ameta de hatutan, hili pineiru rai-henek tanba konsidera pineira rai-henek di’ak liu atividade sira seluk ne’ebé mak duranta ne’e halo, “ema la manda ita, ita servisu tuir ita-nia hakarak”. nia deklara.
Iha sorin seluk, traballador Francisco Tilman sublinha dejafiu ba sira mak wainhira tempu udan, mota sempre lori rai-henek ne’ebé pineira ona, maske nune’e maibe ne’e la sai bareira ba ninia esforsu no servisu kontinua hodi buka osan sustenta família.
“Dalaruma tempu udan hanesan ne’e mota tun mai lori hotu rai-henek ne’ebé mak ha’u pineira ona, maibe ita nafatin pasiensia no aban hanesan ne’e mak ha’u mai pineira foun fali, buka osan la fasil”. Dehan Francisco Tilman.
Traballador ne’e hateten, rendimentu ne’ebé nia hetan bele ona ajuda ba ninia nesesidade loron-loron no oan sira-nia eskola.
“Rendimentu ne’ebé mak kada loron ha’u hetan bele ajuda ami-nia presiza loron-loron liliu fasilita labarik sira eskola no balun uza hodi halo uma”. Nia informa.
Tuir observasaun Jornalista SAPNews iha mota comoro nota katak komunidade sira kada loron sempre buka moris ka rendimentu liu hosi pineira rai-henek hodi hadia nia kualidade moris.
