Ajuda Joven Sai Emprezáriu & Inovativu ! Governu Lansa Konstrusaun Sentru Inkulbasaun
SAPNewsTL, Díli : Ministru Komersiu Industria hamutuk Vise Primeiru Ministru Asuntu Ekonomia, Ministru Turizmu no Ambiente lansa fatuk dahuluk ba konstrusaun sentru inkubasaun hodi transmite ideia negosiu inovativu ba joven sira.
Vise Primeiru Ministru, Ministru Asuntu Ekonomiku no Ministru Turizmu no Ambiente Fransisco Kalbuadi Lay, dehan sentru inkubasaun ne’e sei ajuda joven emprejariu sira sai legal, formal no kompetetivu hodi kontribui ba dezenvolvimentu ekomonia.
“Ohin ita tau fatuk dahuluk ba sentru inkubasaun negosiu, sentru ida ne’ebe sei sai oportunidade, esperansa no haburas ideia joven no empreza hodi tranforma sira nia mehi ba realidade, sentru ne’e sei liga ita-nia emprejariu sira ba finansa no investor sira atu hametin abilidade no kapasidade gestaun nian, habelar merkadu no fo apoiu ba feto no foinsa’e sira no emprejariu rural”, Dehan Vise Primeiru Ministru, Ministru Asuntu Ekonomiku no Ministru Turizmu no Ambiente Fransisco Kalbuadi Lay, iha Matadoru Dili, Quinta-feira,22/01/2026.
Vise Primeiru Ministru ne’e salienta sentru inkubasaun sei apoia orientasaun no monitorizasaun hodi fo oportunidade ba negosiu foun sira atu dezenvolve ideia sai inovasaun
“Sentru inkubasaun negosiu sei fornese orientasaun no monitorizasaun hodi ajuda negosiu foun sira, hamenus risku ne’ebe sira hasoru iha sira nia faze inisial no vulneral, fatin ne’e sei enkoraja inovasaun no emprendedorizmu hodi tranforma ideia diak, ne’ebe negosiante sira bele susesu liu tan”.
Governante ne’e informa husi sentru inkubasaun ne’e sei sai hanesan fundasaun ba progresu empregu, fundasaun ba oportunidade no fundasaun ba Timor-Leste ne’ebe forte no rejiliente hodi hamenus kiak, hadia padraun moris nian no enkoraja investimentu privadu husi rai-laran no rai-liur.
Iha Fatin hanesan, Ministru Komersiú no Industri Nino Pereira haktuir, lansamentu fatuk dahuluk ba sentru inkubasaun fo oportunidade ba joven hodi aprende sai emprejariu.
“Lansamentu fatuk dahuluk ba konstrusaun foun sentru inkubasaun negosiu, sentru ida ne’e atu fo espasu ba ita ninia empregador sira no joven emprezariu sira ne’ebé hakarak haklean liu tan koñesimentu no hakarak fo vontade makas bele envolve vida empresariu”.
Ministru ne’e dehan, ezistensia sentru inkubasaun ne’e atu aumenta joven sira ninia konhesimentu kona-ba negosiu no sai emprejariu iha Timor-Leste .
“Sentru ida ne’e atu bele sai hanesan fatin ida atu bele haree oportunidade ba kriasaun negosiu, oportunidade ba kriasaun empregu no kontribui ba ita ninia koñesimentu ekonomiku no sai plataforma ida ba joven sira atu iha hanoin ne’ebé mak kriativu no inovativu, atu bele aprende hahu negosiu oinsa haree dezafiu no difikuldade ne’ebé maka sira hasoru liliu mak asesu finanseiru”.Nia hateten.
Entertantu kompanha manan nain ba projetu kontrusaun sentru nasional inkubasaun Matadoru, JIANGSU ZHUOXU construction CO.LTD (China), joint Venture ho YOUNGLING HOLDING Unipessoal, LDA, Kai Watu Kmanek konsultant, Unipessoal LDA. No PT. Pola Teknik Konsultan.
Lansamentu fatuk dahuluk ba sentru inkubasaun partisipa husi Vise Primeiru Ministru no Ministru Koordenador Asuntu Ekonomiku no Ministru Turizmu no Ambiente Fransisco Kalbuadi Lay, Ministru Komersiú no Industri Nino Pereira, Deputada Olinda Guterres, Sekretáriu Estadu Komunikasaun Sosiál Expedito Loro Dias, Autoridade Postu Administrativu Vera Cruz.