Indonesia : Aviaun ATR 42-500 Monu Rezulta Ema Na’in 10 Lakon Vida

Imajem : Ekipa Konzunta rekolla mate-isin na’in 10 ne’ebe sai vítima ba asidente aviaun ATR 42-500 iha Sulawesi-Sul, 23/01/2026. Foto : ANTARA

Sapnews Pro : Ligadu ho aviaun ATR 42-500 ne’ebe monu iha Sulawesi Súl, loron 18 Janeiru 2026, Ekipa Konzunta hetan ona vítima hamutuk na’in 10 ne’ebe lakon vida iha asidente refere.

Ekipa Konzunta ba operasaun no evakuasaun ba vítima sira hosi asidente aviaun ATR 42-500 iha foho Bulusaraung, Sulawesi Súl, remata iha loron-sesta kalan (23 Janeiru), hetan mate-isin hamutuk na’in 10.

“Ha’u deklara operasaun buka no evakuasaun ba asidente aviaun ATR 42-500 nian kompletu ona”, hatete Xefe Basarnas, Marexal Aéreu Mohammad Syafii, iha konferénsia imprensa ida iha loron-sesta kalan, 23/01/2026. Sita BBC News

Syafii informa bazeia ba rezultadu identifikasaun hosi Ekipa Mitigasaun Dezastre Polísia Nasionál nian katak hetan ona mate-isin na’in 10 iha fatin akontesimentu.

“Hetan ona mate-isin na’in 10, sira-nia identidade kada vítima maka sei identifika hela”, nia esplika.

Enkuantu, to’o oras ne’e identifika ona mate-isin nain tolu maka Funsionáriu Ministériu Asuntu Marítimu no Peskas (KKP) Deden Maulana, Assistente aviaun nain rua, Florencia Lolita Wibisono no Esther Aprilita S.