Konstrusaun Estrada Gleno-Letefoho Sei Konklui Iha Tinan 2027, Estrada Atsabe Prosesu Besik Remata

Sapnews Pro, Díli : Primeiru Ministru Kayrala Xanana Gusmão hamutuk ho membru governu no populasaun Ermera ofisialmente lansa ona estrada Gleno-Letefoho iha Suku Eraulo, Munisipiu Ermera.

Ministru Obras Públikas, Samuel Marçal hateten prioridade Governu mak hadia estrada rurál, maibé prosesu konstrusaun presiza tuir estudu tékniku, dezenhu no lei aplikável hodi assegura kualidade.

“Konstrusaun tenke tuir lei no kualidade, Governu tenki fó prioridade ba estrada rurál no estrada Ermera, maibé prosesu hotu presiza halo ho estudu tékniku, dezenhu no tuir lei aplikável.” Dehan Ministro Obras Públikas Samuel Marçal ba Jornalista sira iha Ermera,26/01/2026.

Samuel hatutan, Projetu refere laos esforsu MOP de’it, maibé rezultadu hosi servisu hamutuk entre instituisaun estadu sira no Banku Mundiál. Se komunidade fó koperasaun diak, estrada Gleno–Letefoho bele konklui iha tinan 2027.

“Projetu estrada Gleno–Letefoho laos esforsu MOP de’it, maibé rezultadu hosi koordinasaun no servisu hamutuk entre KRO, ADN, CNA, membru Governu no Banku Mundiál”.

“Komunidade presiza pasiénsia no apoia prosesu konstrusaun, inklui prosesu indemnizasaun ba ema sira ne’ebé afetadu hosi projetu, se iha koperasaun diak, estrada ida-ne’e bele konklui iha tinan 2027 no fó impaktu positivu ba ekonomia, edukasaun, saúde no turizmu” Nia informa.

Ministru Obras Públicas (MOP) Samuel Marçal deklara “ohin asina estrada Gleno-Letefoho, semana oin sei asina estrada Humboe-Ermera Antiga”, Enkuantu estrada Letefoho ba Atsabe mós nia prosesu besik atu hotu ona tanba ne’e sei halo wainhira prosesu remata.

Iha Fatin hanesan, Prezidente Autoridade Múnisipiu Ermera PAM-E José Martinho dos Santos hateten, projetu estrada ne’e hanesan resposta Governu ba esforsu tinan-naruk komunidade Ermera nian ne’ebé husu hadia asesu estrada.

“Projetu estrada ne’e mak resposta ba esforsu tinan-naruk komunidade Ermera nian, maski munisípiu enfrenta hela dezafiu oioin hanesan asesu be’e, eletrisidade, edukasaun no saúde”.

Ministru afima Governu kontinua hatudu kompromisu atu hadia infraestruturas baziku, inklui estrada, merkadu munisipál, edifísiu assembleia munisipál no projetu ospitál.

“Metade husi estrada ho distánsia 108 kilometru ne’ebé seidauk konstrui tama ona ba planu Governu tinan 2026.” Nia informa

Primeiru-Ministru Kay Rala Xanana Gusmão subliña, dezenvolvimentu nasional la bele la’o diak, se laiha infraestrutura baziku liuliu estrada no ponte, ne’ebé sai hanesan fundasaun ba kresimentu setór oioin.

“Infraestruturas baziku liuliu estrada no ponte, mak base prinsipal ba dezenvolvimentu nasional”. Nia salienta

PM hatutan, asessu estrada diak aumenta oportunidade edukasaun, saúde no dezenvolvimentu ekonomiku lokal.

“Asesu estrada fó oportunidade ba labarik sira atu ba eskola, no moras sira hetan tratamentu, no mos hamoris ekonomia lokal”.

Primeiru-Ministru mós husu autoridade lokal, xefe suku no komunidade atu hanorin disiplina ba joven sira, hadomi ambiente no evita asaun ne’ebé bele halo impedimentu ba projetu.

Serimónia ne’e marka komitmentu Governu atu kontinua dezenvolve infraestruturas baziku hodi hadia moris povu Ermera nian no hamenus disparidade dezenvolvimentu iha área rurál.

Projetu estrada ne’e hetan finansiamentu husi Governu no sei implementa husi China Civil Engineering Construction Corporation (CCECC), tuir kontratu ho númeru TENDER/191/MOP–2024.

Iha lansámentu primeira pedra ba projetu konstrusaun estrada Letefoho (km 30+230) – Gleno (km 54+370), ne’ebé sei konstrui durante loron 365 ho orsamentu hamutuk $38,800,054.00.

Governu mós lansa projetu Estrada Urbanu no Drainajen Gleno, ne’ebé sei konstrui iha pakote rua. Pakote 1 ho orsamentu $2,640,762.21 no Pakote 2 ho orsamentu $3,214,929.67, ne’ebé sei ezekuta husi Shabryca Construction UNIP, Lda ho durasaun tinan ida.

Iha serimónia lançamentu ne’e hetan partisipasaun maksimu hosi populasaun sira, autoridade munisípiu Ermera no membru governu dasia.