Hasa’e Literasia Dijitál ! Telkomcel & ESTV-GTI Becora Asina Akordu & Fahe Simcard Gratuita
Imajem : Telkomsel & ESTV-GTI Becora assina akordu kooperasaun iha Díli, 28/01/2026. Foto : Média Telkomcel
SAPNewsTL, Díli : Operador Telekomunikasaun Telkomcel asina akordu kooperasaun ho Eskola Tékniku Vokasionál (ESTV-GTI) Becora hodi hasa’e empoderamentu no literasia dijitál ba estudante no profesór/a sira.
Reprezentante CEO Telkomcel Heru Yulianto hateten akordu ne’e hanesan forma ida hosi kompromisu Telkomcel atu apoiu dezenvolvimentu rekursu umanu iha setór edukasaun.
“Ne’e kompromisu Telkomcel nian ne’ebe atu fó apoiu ba dezenvolvimentu rekursu umanu iha iha setór edukasaun”. Dehan Reprezentante CEO Telkomcel Heru Yulianto ba Jornalista Sapnews iha salaun ESTV-GTI Bekora Díli quanrta-feira 28/01/2026.
Reprezentante CEO Telkomcel haktuir hosi parseria ne’e Telkomcel fó Simcard Estudante ho benefísiu espesífiku, asesu internet, Biblioteka Dijitál no TPay hanesan pagamentu eletróniku (cashless).
“Liu hosi parseria ne’e, Telkomcel oferese Simcard Estudante ho benefísiu espesífiku, asesu internet hanesan janela ba mundu dijitál, plataforma Biblioteka Dijitál no introdusaun TPay hanesan métodu pagamentu eletróniku (cashless).” Nia informa
Reprezentante CEO Telkomcel informa inisiativa ne’e alinha ho misaun kompania nian digital ba nasaun.
“Misaun Telkomcel mak atu fó apoiu ba dezenvolvimentu rekursu umanu iha Timor-Leste. Ami implementa ona programa dijitál iha universidade no eskola Universiade sira, no agora extende ba nivel eskola vokasionál atu estudante sira bele iha asesu dijitál ne’ebé adekuadu,” hateten nia.
“Ho asesu internet no plataforma dijitál, estudante sira bele prepara an ba merkadu servisu, iha rai-laran ka rai-li’ur, ka kontinua estudu iha nivel aas liu”. Nia sublina
Iha fatin hanesan, Diretora ESTV-GTI Becora, Benedita de Almeida, konsidera akordu ne’e hanesan pasu importante atu responde ba dezafiu era dijitál no Inteligénsia Artifisiál (AI).
“Digitalizasaun, agora tama ona iha era AI. Parseria ho Telkomcel ajuda estudante no profesór/a sira atu kompriende no uza teknolójia ho di’ak liu. Fasilita Simcard gratuita no asesu internet importante tebes ba prosesu aprendizajen.” hateten Benedita.
Diretora hatutan ESTV-GTI prepara ona sala modernu ho fasilidade dijitál no eskola mos iha regulamentu ne’ebe sei regula utilizasaun teknilójia.
“ESTV-GTI prepara ona sala modernu ho fasilidade dijitál atu suporta inovasaun iha materia aprendizajen, no eskola iha regulamentu internu atu regula utilizasaun teknolójia tuir etika no moral” Nia salienta
Ho kooperasaun ne’e, parte rua espera atu hasa’e kualidade edukasaun dijitál iha ESTV-GTI Becora no prepara estudante sira sai rekursu umanu ne’ebé kompetente no profesional iha futuru.