Loron Transformasaun FALINTIL Ba F-FDTL ! Expedito : “Defeza & Mídia Elementu Estratéjiku Rua Iha Sistema Demokrátiku”
Foto : Especial
Sapnews Pro, Díli : Iha komemorasaun aniversáriu transformasaun FALINTIL nian ba Forsa Defeza Timor-Leste (F-FDTL) ba dala-25, Governu, liuhosi Sekretaria Estadu Komunikasaun Sosiál (SECOMS), hato’o apresiasaun aas ba membru F-FDTL tomak ba sira-nia dedikasaun no kontribuisaun hodi salvaguarda nasaun nia integridade no soberania.
Transformasaun FALINTIL ba F-FDTL nu’udar akontesimentu istóriku ida ne’ebé konsolida luta nasionál ba sistema konstitusionál, profisionál, no defeza nasionál ne’ebé orienta ba interese nasionál no valór demokrátiku.
“Iha dinámika dezenvolvimentu nasionál, F-FDTL hatudu ona papél estratéjiku hodi mantein estabilidade no seguransa, no mós hodi fó apoiu ba esforsu umanitáriu, jestaun ba dezastre, no kooperasaun internasionál, hodi hametin Timor-Leste nia pozisaun iha nível mundiál”. Hateten SEKomS Expedito Loro Dias Ximenes iha Díli, 02/02/2026
Governu hanoin katak profisionalizmu instituisaun defeza nian tenke la’o hamutuk ho transparénsia informasaun públiku, nu’udar parte ida ba prinsípiu governasaun di’ak iha Timor-Leste.
Sekretaria Estadu Komunikasaun Sosiál (SECOMS) iha Nonu Governu Konstitusional subliña importánsia atu mantein relasaun armonioza no respeitu entre setór defeza no mídia nu’udar elementu estratéjiku rua iha sistema demokrátiku ida ne’ebé funsiona independentemente maibé komplementa malu.
“Interasaun bazeia ba komprensaun institusionál, étika profisionál, no responsabilidade públiku hein atu hametin kna’ar mídia nian hodi hato’o informasaun ne’ebé loos, ekilibradu no kontribui ba aumenta programa dijital iha literasia públiku kona-ba asuntu defeza no seguransa”. Nia sublina
Governu afirma nia kompromisu atu kontinua haburas diálogu konstrutivu entre F-FDTL no imprensa hodi hametin konfiansa públiku, salvaguarda liberdade espresaun no imprensa, no apoia konsolidasaun demokrasia no dezenvolvimentu sustentável iha Timor-Leste.
Tinan ne’e Estadu Timor-Leste komemora loron transformasaun FALINTIL ba F-FDTL ba dala-25 ne’e hala’o iha munisípiu Aileu.