Kandidatu Membru PNTL Hamutuk 10.597 Pasa, Kandidatu 400 Sei Tuir Teste Médiku

Imajem : Konferensia Imprensa

Sapnews Pro, Díli : Sekretariadu Rekrutmentu Membru Polícia Nacional Timor-Leste anunsia ba públiku resultadu teste kandidatu hamutuk 10.597 Pasa & 2.277 La Pasa husi total 12.874 kandidatus.

Lista ba kandidatu ne’ebe pasa no la pasa sei taka sai iha kuadru avizu kada Komandu PNTL munisipiu iha territóriu nasional iha loron 04 Fevereiru 2026.

Porta voz sekretariadu Rekrutamentu PNTL “husu ba kandidatu sira bele ba haree orariu teste médiku nian ne’ebe sei taka iha komandu munisipiu ida-idak nian”. Dehan porta voz PNTL Antônio da Luz iha Salaun CFP, Dili, 03/02/2026

Porta voz ne’e deklara prosesu rekrutamentu ba Membru PNTL foun ne’e ho kategoria jeral, laiha ona kouta ba Membru PNTL nia oan no veteranu nia oan tanba antes ne’e Provedoria dos Direitos Humanos e Justiça (PDHJ) halo paraser ba Tribunal Recurso hodi konsidera inkonstitusional.

“Rekrutamentu ne’e jeral, la haree ba povu baibain nia oan, PNTL nia oan no Veteranu nia oan maibe ba hothotu, se mak esforçu mak bele pasa”. Nia inforna

Rezultadu kandidatu ne’ebe aprovadu no la aprovadu iha kada munisípiu :

Munisípiu Aileu mane 484 no feto 234, total hamutuk 718, munisípiu Ainaro mane 446 no feto 141, total 587, munisípiu Atauro mane 63 no feto 16, total 79, munisípiu Baucau mane 576 no feto 147, total 722, munisípiu Bobonaro mane 503 no feto 182, total 685, Covalima mane 424 no feto 124, total 548.

Munisípiu Dili CFP mane 2069 no feto 845, total 3014, Ermera mane 719 no feto 262, total 981, munisípiu Lautém mane 374 no feto 136, total 510, munisípiu Liquiça mane 349 no feto 135, total 475.

Tuir mai, munisípiu Manatuto mane 397 no feto 155, total 552, munisípiu Manufahi mane 429 no feto 138, total 567, munisipiu RAEOA mane 402 no feto 119, total 521 no ikus liu munisípiu Viqueque Mane 491 no feto 147 total 638.

Entre sira, kandidatu hamutuk atus haat (400) husi kuota kada munisípiu maka sei tuir teste médiku iha nasional.

Kalendariu prova medika ba kandidatura sira, iha loron 10/02/2026 Munisípiu Aileu total 20, Ainaro total 25 no Atauro total kandidatu 10. Loron 11/02 munisípiu Baucau ho total kandidatu 40 no Bobonaro 20.

Loron 12/02 munisípiu Bobonaro 20, Covalima 25 no Dili/ Dili CFP 15. Loron 13/02 munisípiu Dili/ Dili CFP 25 no Ermera 37. Loron 16/02 munisípiu Lautém 27 no munisípiu Liquiça 26. Loron 17/02 munisípiu Manatuto 25 no Manufahi 25. Loron 18/02 munisípiu Oé-Cusse 25 no Viqueque 35.

Tuir mai akompanha faze sira ba teste saúde iha Hospital Nacional Guido Valadares (HNGV) :

Kandidatu sira ne’ebe mai tuir teste mediku maka detekta moras tuir resultadu mediku, maka sei bolu fali kandidatu neebe naran tuir mai, tuir kuota kada munisipiu ida-idak nian.

kandidatu sira neebe mai tuir teste mediku sei lori dokumentu komprovativu maka hanesan tuir mai:
a. Resibu prova kultural nian.

b. Kartaun eleitoral original ou bilhete identidade original

c. Resivu teste intervista profesional neebe asina husi intervistador sira.

d. Kandidatu neebe mak la lori dokumentu komprovativu sira hanesan kartaun eleitoral ou bi, resibu intervista sekretariadu ho ekipa mediku sei la atende no konsidera la aptu.

Kalendariu teste médiku ba kandidatu atus haat hahu hosi loron 10 to’o 18 fulan Fevereiru 2026.