Seguro Eleitu Ba Prezidente Portugal ! PR Horta Kongratula & Reafirma Kompromisu Amizade no Kooperasaun
Imajem : Kandidatu Presidente Portugal, Antonio José Seguro & André Ventura
Sapnews Pro: Iha segunda volta eleisaun prezidensiál entre kandidatu na’in rua ne’e, António José Seguro eleitu nu’udar Prezidente Portugál ho persentajen porsentu sia nulu resin neen (66%), enkuantu André Ventura hetan pursentu tolunulu resin tolu (33%).
Ligadu ho rezultade ne’e, Presidente Republika Demokratika Timor-Leste hato’o kongratulasaun boot ba Presidente Portugal Eleitu hodi reafirma kompromisu atu kontinua relasaun exelente amizade, kooperasaun no solidariedade.
“Ho satisfasaun boot mak ha’u oferese ba Estimadu Belun, António José Seguro, ha’u-nia parabéns ba Ita-Boot nia eleisaun nu’udar Prezidente Repúblika Portugál, iha segunda volta eleisaun prezidensiál ne’ebé hala’o iha loron 8 fulan-Fevereiru tinan 2026”.
Imajem : Karta Presidente República Democrática Timor-Leste, José Ramos Horta
Ramos Horta mos reafirma kompromisu atu kontinua relasaun exelente amizade, kooperasaun no solidariedade entre Timor-Leste no Portugal.
“Ha’u aproveita oportunidade ida-ne’e repete Timor-Leste nia kompromisu metin atu kontinua aprofunda relasaun exelente amizade, kooperasaun no solidariedade nian ne’ebé halibur ita-nia nasaun rua, iha konviksaun katak ita-boot nia mandatu sei loke oportunidade foun ba diálogu no hametin parseria bilaterál”. Nia sublinha
Tuir publikasaun Expresso, kandidatu André Ventura fó parabéns ba António José Seguro ba Antonio Jose Seguro nia vitória, “votu ba mandatu boot ida”. André Ventura hatete ida-ne’e iha Portugal iha loron 8 fulan-Fevereiru tinan 2026. Tuir Expresso
Ventura hatutan, “Independentemente sai adversáriu, António José Seguro nia susesu lidera Portugál sei sai ema hotu nia susesu”, tenik Ventura.
Entretantu, kandidatu eleitu António José Seguro hateten, “Maioria ne’ebé hili ha’u iha kalan ne’e,” eleitu sai Presidente Portugal, agradese ba povu portugés ne’ebé vota iha domingu ne’e.
António José Seguro destaka aderénsia maka’as ida ba valór demokrátiku sira, iha Portugál pluralista ida ne’ebé unidu iha ninia unidade koletiva. No nia husik hela “obrigadu emosionál” ida ba ema hotu ne’ebe tuir eleisaun, nomeadamente protesaun sivil, bombeiru sira, autoridade lokál sira, forsa seguransa sira no traballadór sira asaun sosial nian.
Dirije ba André Ventura, nia afirma katak, hahú ohin ba oin, nia sei la sai tan nia adversáriu no reforsa katak nia sei sai hanesan “prezidente ba ema hotu, ema portugés tomak”.
Ko’alia ho “fuan ne’ebé nakonu ho gratidaun no responsabilidade”, Seguro lemra hikas katak “labarik-mane ida hosi aldeia ki’ik ida iha interiór, oan hosi família simples ida, ne’ebé aprende valór hosi serbisu, onestidade no kumpri nia liafuan”.
Joven ida ne’ebé fiar katak polítika bele muda moris, “Ha’u nafatin hanoin, ha’u hanesan baibain. Ha’u hanesan imi ida, ami ida”, nia hatete, akompanha ho basa liman maka’as iha auditóriu Caldas da Rainha.
Tuir Expresso, rezultadu eleisaun prezidensiál iha segunda volta hatudu katak kandidatu númeru 1, Antonio José Seguro, hetan votu 3.482.481 (66,82%), no kandidatu númeru 2, André Ventura, hetan votu 1.729.381 (33,18%). Rezultadu ne’e amostra Andre Ventura hetan derrota no Antonio Jose Seguro hetan vitoria ho votus maioria absoluta iha eleisaun presidensial segunda volta.
