PM Xanana Husu V-MF Regina, “Servisu Ho Fuan & Ulun” Hadia Sistema Finanseira
Imajem : Vise Ministra Finansa Regina de Jesus hamutuk ho Presidente Republika José Ramos-Horta no Primeiru Ministru Kay Rala Xanana Gusmão iha Palásiu Presidente Nicolau Lobato, 12/02/2026
Sapnews Pro, Díli : Prezidente Repúblika (PR), José Ramos-Horta fó pose bá Vise-Ministra Finansas Regina de Jesus de Sousa, Primeiru Ministru Xanana Gusmão ejize atu servisu ho fuan no ulun (responsabilidade no integridade).
Nomeasaun ne’e bazeia bá kapasidade téknika no esperiénsia hosi Regina de Jesus de Sousa nu’udár espesialista finansas iha Ministériu Finansas durante tinan 20-resin.
Prezidente Ramos-Horta depozita konfiansa tomak bá Regina de Jesus de Sousa ne’ebé sei lori perísia esepsionál, integridade ne’ebé metin, no kompromisu kle’an bá servisu públiku liu-liu bá papél vital ida ne’e.
“Ninia lideransa sei sai krusiál hodi promove estabilidade ekonómika ita-nia nasaun nian, garante disiplina fiskál no reforsa fundasaun governasaun di’ak bá benefísiu povu Timor-oan tomak,” Xefe Estadu José Ramos-Horta iha Palásiu Prezidensiál Nicolau Lobato, 12/02/2026.
Primeiru Ministru Kay Rala Xanana fo parabéns ba Vise Ministra foun Regina de Jesus no husu atu servisu ho fuan no ulun hodi hadia sistema finansas.
“Ha’u fo konfiansa ba ita-boot no ezize servisu ho fuan no ulun bainhira madatu IX governu nian remata sistema finanaseiro ita bele resolve ho diak”. Dehan Primeiru Ministru
Xanana Gusmão fo fiar ba Vise Ministra foun hodi servisu ho diak tanba nia kompetente ba servisu finansas.
“Vise Ministra Finansas (V-MF) foun kompetente no responsavel tanba ita mos iha prosesu hadia tiha sistema finanseiru ne’ebe governu uluk kria hodi muda tiha sistema”. Nia sublina
Xanana mós husu Vise Ministra atu servisu ho didiak, kordena ba malu hodi hadia para bainhira mandatu remata sistema finanseiru tenke la’o diak.
“Fo atensaun ba maluk sira ne’ebe toma konta finansas iha munisipiu sira tanba ita atu tama ba iha dezentrelizasaun. Ha’u-nia konfiansa bá imi na’in-rua no sei ejize atu servisu ho responsabilidade no integridade,” PM Xanana husu.
Regina de Jesus de Sousa antes ne’e asume Diretora Jerál Tezouru iha Ministériu Finansa, Governu garante vise ministra ne’e sei lori koñesimentu tékniku nível as iha Jestaun Finansas Públikas (PFM) bá pozisaun foun ne’e.
