IGE.IP Preparadu Responde Ba Preokupasaun Komunidade

SAPNewsTL, Dili : Hafoin hetan apoiu ekipamentus pezadu sira husi governu hamutuk unidade 15, Prezidente IGE.IP Hermenegilda hateten IGE iha ona ekipamentu sufisiente hodi bele hatan ba preokupasaun komunidade iha teritoriu nasional.

“Makina foun 15 ne’ebé mak ami simu ne’e husi governu Timor Leste mak sosa liu-liu sua exelensia Primeiru Ministru ne’ebé lidera oitavu governu ida ne’e, tau osan 2 miloens ba makina pezadu sira ne’ebé halo ona serimónia entrega husi kompañia governu mai iha IGE, bele fasilita ona IGE nia servisu pelu menus mellora di’ak liu tan iha futuru, preparasaun ba iha tempu udan, ne’e naton ona mai ami para fasilita ami nia servisu”. Dehan Prezidente IGE.IP Hermenegilda iha nia knaar fatin Colmera, Sexta-Feira, 2/09/2022.

Prezidente ne’e akresenta makina sira mak iha sei halo manutensaun tinan tolu ne’ebé sei responsabiliza husi kompañia.

“Ba makina foun sira ne’e bazeia ba dokumentus ne’ebé iha katak makina sira ne’e nia manutensaun ba tinan tolu,  sei responsável husi kompañia, tan ne’e husi parte IGE nian seida’uk bele prevé orsamentu ba iha makina foun”. Tenik nia

Nia hatutan, makina ne’ebé IGE iha, barak liu mak makina doasaun husi Japaun, maibé kestaun de tempu halo makina sira ne’e ladun funsiona ho di’ak, maibé sira nafatin buka meius atu rezolve problema refere

Entretantu, nia salienta, IGE. IP kontribui ba poupansa orsamental hamutuk 22.5 miloens ba governu durante tinan 4, tinan kotuk konsege poupa miloens tanba ho kalamidade publika, enkuantu iha tinan ne’e foin to’o 900 mil ital.

“Husi parte IGE.IP   kontribui ona orsamentu ba governu ho total 22.5 milões durante tinan 4, husi tinan 2018 to’o 2022 liu husi poupansa orsamentu, durante tinan 4 ne’e iha hetan reseitas 1.5 milões ne’ebé maka tama iha konta bankaria IGE.IP nian,osan sira ne’e mai husi makina pezadus sira ne’ebé maka balu folga no IGE.IP fo ba kompañia privadu sira aluga no mos sira iha makina stone crater ne’ebé maka produs fatuk no sira fa’an ida ne’e hodi hasa’e reseitas estadu nian”. dehan nia

Entretantu, tuir dadus ne’ebé maka iha, makina sira ne’ebé iha kondisaun manutensaun hamutuk unidade 17, makina sira ne’ebé aat total ne’e iha unidade 23., enkuantu makina sira iha kondisaun diak hamutuk 127, existente 112 no foun 15

Jornalista: Dulcio Antonino da Silva

Editor: Ekipa Editorial