Estudante ISFIT Hakerek Livru, Eskritor David Husu ME Tau Konsiderasaun

SAPNewsTL, Dili: Estudante Instituto Superior Filosofia e Teologia (ISFIT) hakerek livru liu husi rezultadu peskiza monografia, Estudante Instituisaun Superior Filosofia e de Teolozia (ISFIT) David Martins husu ba Ministeriu Edukasaun atu valoriza no tau konsiderasaun ba obra ne’e.

Tuir estudante ISFIT David Martins katak  ohin loron ISFIT sai hanesan historia foun ida ne’ebé ho inisiativa rasik hodi hakerek livru maske durante ne’e liu prosesu lubuk ida.

“Ida ne’e sai hanesan primeiru inisiu ne’ebé sei hanoin nafatin atu bele hakerek tuir mai, iha pensamentu ne’e la’os dehan atu hotu to’o iha ne’e maibé, koko atu partilla mos ba ema seluk liu husi eskrita, buat ne’ebé hatene ona ema seluk mos bele asesu”. Dehan Estudante Instituisaun Superior Filosofia e de Teolozia (ISFIT) David Martins ba jornalista sira iha salaun ISFIT,Kuarta-Feira,07/09/2022.

Estudante ne’e mos husu ba Ministeriu Edukasaun atu valoriza no tau konsiderasaun ba obra ne’e atu sira nafatin iha vontade hodi hakerek.

“Estadu Timor Leste liu-liu Ministru Edukasaun tenke tau importansia di’ak ba dosente no estudante sira, tanba seida’uk valoriza, ema la iha vontade atu hakerek buat ruma ba buat ne’ebé hatene, nune’e husu ba Ministru Edukasaun bele tau netik konsiderasaun valor nune’e estudante iha vontade atu bele hakerek”. Tenik nia

Nia hatutan,atu sai nasaun ida ne’ebé di’ak tenke hahú agora husi Ensinu Baziku tanba Timor sei nafatin ba oin.

“Timor ne’e atu sai pais ne’ebé di’ak tenke  iha estudante, hahú kedas husi Ensinu Báziku sa’e mai hodi sai rais ida ne’ebé metin ba oin,  Timor ne’e la’os moris de’it iha tempu agora maibé tinan naruk maske ita la iha ona maibé iha nafatin livru hodi hatutan no konta kontinua istoria sira, ne’ebé husu ba estadu valoriza didi’ak obra ne’ebé iha ona”.

Iha fatin hanesan III Vise Reitor Asuntu Estudante e Cooperasaun  ISFIT, Eulido Augusto Guterres hateten livru ohin lansa ne’e orijinalidade produs husi estudante sira nia obras, husi Senadu fo fiar ba Gabinete Asuntu Estudante, atu halo hamutuk ho Vise Reitor Asuntu Academiku.

“Livru hirak ne’e rezultadu husi peskiza monografia, depois elabora sira hakerek artigu sientíku, ho ida ne’e halo seleksaun ba sira nia artigu hirak ne’e i sira hili ema nain 12 primeiru maibé, nain 4 iha hela prosesu nia laran haree  katak ladun tama kritéria entaun avansa de’it ho nain 8 ne’e mak ohin ita lansa, produs livru ida ne’e bele sai referensia ba kolega sira seluk”. Vise Reitor informa.

Entretantu, Vise Reitor ne’e mos husu estudante ISFIT sira ne’ebé sei hakerek ne’e kontinua hakerek no mos ba joven, estudante sira seluk iha Timor Leste atu bele hakerek livru.

Enkuantu,livru sira ne’e prosesa hahú  seleksaun husi dosente nain ha’at hanesan, III Vise Reitur rasik, Amu Luis, Amu Mateus no Amu Joel, ekipa sira ne’e mak orienta estudante tomak hakerek monografia depois sira halo seleksaun, ikus mai hili ida ne’ebé elabora artigu depois produs livru.

Reportagen: Antonio da Silva

Editor: Ekipa Editorial