F-FDTL No PNTL Halo Operasaun, CNRT Lamenta Jestaun Guvernu Iha Defeza No Seguransa
SAPNewsTL, Dili: Membru Parlamentu Nasionál liu husi bankada opozisaun Congresso Nacional Reconstrução Timor (CNRT) lamenta ho jestaun governu nian kona-ba asuntu Defeza no Seguransa iha Timor Leste no reativasaun organizasaun Arte Marsial iha tempu kampanha.
“Ultimu semana rua ikus ne’e situasaun estabilidade Seguransa hetan perturbasaun oituan liu-liu iha Kapitál Dili, mesmu hanesan saida maka akontese iha Kapitál Dili, maibé ninia efeitu mós ba iha Munisípiu balun, ami hanesan bankada opozisaun, akontesementu ida ne’e hatudu ita nia lamentasoens oituan ho jestaun governu liu-liu iha asuntu Defeza no Seguransa”. Dehan Deputadu Bankada CNRT Aderito Hugo da Costa ba Jornalista sira iha Resintu Parlamentu Nasionál, Segunda-Feira, 12/09/2022.
Deputadu ne’e akresenta, governu liu husi Ministeriu Interiór hatun despaixu ba Komando Jerál Polísia Nasionál Timor Leste (PNTL) Komando FALINTIL Forsa Defeza Timor Leste (F-FDTL) hodi hala’o operasaun kunjuntu iha tempu kalan atu Kontrola Situasaun maibé ida ne’e halo sidadaun barak preokupa.
“Situasaun ida ne’e halo sidadaun barak preokupa no senti ta’uk wainhira atu hala’o movimentu iha tempu kalan tanba ho operasaun kunjuntu refere akumula Membru PNTL hanesan BOP, UPM, UEP, enkuantu husi parte F-FDTL nian maka hanesan Polísia Militár (PM) no mós Membru F-FDTL”. Tenik nia
Nia hatutan, depois iha tinan barak nia laran, governu anterior sira halo jestaun hotu-hotu, relativa ho dezempeñu organizasaun arte marsial sira desde restaurasaun independensia no mós antes independensia tanba hatene saida maka akontese iha Kapitál Dili no mós Munisípiu sira.
“Governu anterior sira halo fajiadamente regulamentasaun regras enkuadramentu legal para atu enkuadra organizasaun sira ne’e iha kanal ne’ebé apropriadu no kontrolu husi governu, Maibé lamenta tebes tanba vontade re-ativa organizasaun sira ne’e iha tempu ida ne’ebé ita halo hela Kampaña eleitoral, liu husi mensagem barak liu ne’ebé hasai ho mensagem aproveitamentu polítizasaun la’ós ho vontadementu lolos katak hakarak halo”. Deputadu ne’e informa
Jornalista: Ermelinda Soares
Editor: Ekipa Editorial