Kazu Violénsia Da’et, FONGTIL Konsidera Kauza Husi Governu
SAPNewsTL,Dili: Forum ONG Timor Leste (FONGTIL) hamutuk ho Rede Organizasaun Sosiedade Sivil (OSS) liu husi komferensia Imprensa segunda-Feira ne’e, bolu atensaun ba Governu atu buka solusaun ba problema sira ne’ebé akontese bebeik iha Kapital Dili.
“Hafoin akontese asaun problemátiku lubuk ida hanesan Joven ida mate iha sela PNTL Kaikoli, tuda malu entre grupu (maioria juventude) iha Bidau, Audian no Vila Verde, sai preokupasaun husi públiku no hamosu ona perturbasaun ba Orden Públiku no la obedese ba Konstituisaun RDTL Artigu 146 no 147 nune’e bolu atensaun ba Governu, oinsá bele buka solusaun ba problema sira ne’ebé akontese bebeik iha Kapital Dili”. Dehan Porta Voz FONGTIL Jorge Madeira liu husi konferensia imprensa, Salaun FONGTIL Kaikoli, Segunda-Feira, 12/09/2022.
Portavoz ne’e akresenta, abut husi destruisaun sira ne’e mak governu rasik tanba konsidera governu mak la kria kondisaun di’ak no laiha kriatividade atu kria kampu de traballu.
“Problema sira ne’e mosu, nia abut mai husi Governu rasik, tanba la kria kondisaun di’ak ba joven sira, joven barak mak moris iha pobreza, dezempregu ne’ebé a’as tanba menus kampu de traballu iha Timor Leste”.
FONGTIL ho OSS husu ba governo atu halo estratejia politika ba joven sira nia futuru no investe iha edukasaun no kampu traballu atu labele hanoin hahalok violénsia nian.
“Husu ba Governu atu labele Garantia de’it ba Australía no Korea mak fó serbisu ba joven sira iha Timor Leste maibé tenke investe ona iha politika estratéjiku ba futuru juventude sira nian liu husi investimentu ba edukasaun no kria kampu serbisu ba juventude sira atu nune’e joven sira la monu ba hanoin no hahalok violensia nian”.
Jornalista: João Marito
Editor: Ruivo Bonat