Realiza Workshop Ba Autoriedade, INCSIDA Konsidera HIV-SIDA Barak Mai Husi Estranjeiru

SAPNewsTL, DILI: Instituto Nacional de Combate ao HIV-SIDA. I.P (INCSIDA) realiza Semináriu Nasional ba involvimentu Autoridade Munisipiu sira iha asaun prevensaun HIV-SIDA hodi identifika no fo solusaun ba hahalok risku ne’ebé mak fo impaktu ba transmisaun HIV-SIDA   ho tema papel autoridade lokal ba prevensaun HIV SIDA.I.P iha Timor Leste.

Tuir Prezidente Instituito Nacional de Combate HIV-SIDA.I.P Inocensio Soares katak aktividade workshop ne’e partisipa husi autoridade loka sira hodi diskute ba transmisaun moras HIV SIDA iha Munisipiu Dili no sira seluk.

“Atividade ida ohin ami konvida autoridade lokal husi Munisipiu Dili  hahu husi Xefe  Aldeia Xefe  Suku, Lia nain, Xefe Postu no Prezidente Autoridade Munisipiu hodi diskuti oituan kona-ba lala’ok ne’ebé mak moras HIV-SIDA  hada’et iha Munisipiu Dili  no Munisipiu sira seluk”. Dehan  Prezidente Instituito Nacional de Combate HIV-SIDA.I.P Atanasio de Jesus ba jornalista iha salaun Luz Clarita Formosa Kuarta-Feira, 14/09/2022.

Prezidente ne’e akresenta, aktividade ne’e ko’alia klean liu ba ba ezistensia ema  estranjeiru sira ne’ebé  tama mai iha nasaun ne’ebé halo atividade  ilegal liu-liu tama iha atividade prostituisaun no sira ne’e parte imigrasaun haree de’it sira nia dokumentu maibe la haree mos sira nia kondisaun.

“Entranjeriu sira ne’e ita haree sira nia dokumentu dehan mai hala’o sira nia traballu maibé laiha ida sira mos halo fali atividade sexual iha hotel, kost no  lori hotu moras HIV-SIDA  hada’et hotu mai ita nia nasaun ida ne’e”. Tenik nia

Nia hatutan, sira konvida Autiridade lokal sira hodi  tuir seminariu ne’e atu hamutuk prevene moras ne’ebé mak agora daudaun infrenta hela iha kapital Dili no Munisipiu sira seluk .

 “Ita nia Autoridade no Na’i ulun sira presiza tau matan ba ita nia reinu sira ne’ebé mak agora daudaun ne’e hela iha hotel no kos ita mos tenki kontrola sira nia atividade loro-loron sira halo iha  ida-idak nia uma no servisu fatin, no mos fo hanoin liu estudante no joven sira, tau matan ba sira labele husik moris  livre liu, presiza tau atensaun ba sira atu nune’e bele hado’ok an husi atividade sexual livre ne’ebé mak infrenta iha Aldeia no Suku laran”. Nia salienta

Entretantu, Xefe Suku Fatuhada Marcelino Soares hateten lider komunitáriu sira nia funsaun  mak oinsa hamutuk  atu prevene HIV-SIDA.

“Ami lider komunitariu sira mai tuir formasaun ida ne’e atu bele prevene no reduz moras HIV SIDA iha komunidade sira ne’ebé mak agora hetan hela moras ida ne’e no tenki halo sosializasaun maka’as hodi fo informasun klaru ba sira ne’ebé mak servisu iha saúde  ba komisaun HIV SIDA.I.P ne’e tanba sira mak bele hantene klean liu ba iha moras ida ne’e”. Nia hatete

Jornalista: Antonio Tilman & João Marito

Editor: Ekipa Editorial