FPDTL Realiza Semináriu Avalia Formandu Administrasaun Finansas

SAPNewsTL, Dili: Formasaun Parseiru Dezenvolvimentu Timor Leste (FPDTL) realiza Semináriu ba estudante formasun Administrasaun  Finansas, Objetivu husi Formasaun ne’e  hodi desenvolve no promove sira nia talentu no kuiñesimentu iha formasaun administrasaun finansas.

“Ami organiza realiza semináriu, para oinsa ajuda sira mai fó avalia ba sira nia prosesu durante fulan tolu, atu bele hatene tuir sira nia kapasidade to’o iha ne’ebé, ida ne’e maka organizasaun nia objektivu prepara halo semináriu, prioridade liu  ba iha programa Administrasaun Finansas nian”. Dehan Direktor Ezekutivu Formasaun Parseiru Dezenvolvimentu Timor Leste (FPDTL) Sancho Belo do Rego iha Sentru  Formasaun FPDTL Farol-Palapaso, Sexta-Feira, 16/09/2022.

Direktor Ezekutivu ne’e haktuir, estudante sira iha faze prátika no husi organizasaun sei buka fatin atu sira bele estajiu.

“Agora dada’uk sei faze preparasaun, semináriu hotu mak tuir pratika, antes atu  pratika besik remata, husi organizasaun buka fatin ba sira atu nune’e sira mos ba estajiu iha fatin instituisaun ne’ebé mak organizasaun sira halo liña kordenasaun los ona”. tenik nia

Direktor ne’e mos husu ba estudante sira atu labele para iha dalan maibé kontinua aprende atu hasa’e kapasidade.

“Husu ba estudante sira la bele lakon oportunidade atu tuir formasaun sira ne’ebé mak iha no avansa nafatin ho prosesu ne’ebé mak ita iha no labele husik iha dalan de’it maibé garantia ba ita nia kapasidade ne’ebé mak agora la’o  dada’uk”.  nia sublinha

Iha fatin hanesan, ekipa juri II Mateus Lobo haktuir FPDTL konvida sira atu fo avaliasaun ba estudante ne’ebé tuir seminariu hodi determina formasaun administrasun finansas sira ba estajiu.

“Konvida ami mai nu’udár juri atu mai hodi fo avaliasaun ba estudante formasaun naun formal no iha prosesu aprezentasaun ne’e, sira mai ho tópiku diferente saida mak ami avalia ba sira haree ba material, aprezentasaun no maneira husi aprezentasaun”. hatete nia

Entretantu, estudante husi formsaun administarsun finansas Cristina Xaves hateten liu husi seminariu ida ne’e hodi loke fali no relembra fali saida mak sira tuir ona iha  formasun durante Fulan tolu nia laran kona-ba administrasaun finansas.

“Durante ami tuir formasun Fulan 3 ne’e ami sente di’ak maibé hanesan materia ne’ebé ami simu ne’e sente di’ak, ami ne’e sente menus uituan ba materia ne’ebé aprende, maibé ami nafatin esforsu estuda manual ne’ebé mak ami hetan ona ne’e hodi aprende di’ak liu tan”. nia salienta

Jornalista : António Tilman

Editor : Ekipa Editorial