Klube 13 Partisipa Kompetisaun Voleibol, Kria Jogu Promove Unidade Nasional

Imajen klube sanulu resin tolu ne’ebe kompete iha jogu voleibol Movimentu Juventude Mudansa Cup 2022.

SAPNewsTL,Dili: Movimentu Juventude Desportu Timor Leste realiza kompetisaun Voleibol, Movimentu Juventude Mudansa Cup refere sei partisipa husi klube hamutuk sanulu resin tolu (13), jogu ne’e sei hahu husi loron 24 Fulan Setembru no remata iha loron 10 Fulan Outubru tinan ne’e.

Tuir Prezidente Komisaun Organizador Leonardo Benigno Tilman katak aktividade ne’e realiza iha ambitu komemorasaun loron konsulta popular ne’ebé tinan ne’e ita selebra ba dala-23 ne’ebé determina distinu Timor Leste sai nasaun independente atu promove  juventude sira  nia talentu liu husi desportu ho modalidade voleibol.

“Objektivu atu kria ambiente no espiritu foun ba juventude sira hodi tane aas valor ukun rasik an husi  sakrifisiu no sofrimentu ita nia eroi sira nian nune’e hodi atinje objektivu ba ukun rasik an nian ho paz dame no trankuilidade no promove  juventude sira  nia talentu liu husi desportu ho modalidade voleibol hodi inspira juventude sira hotu moris saudavél kompetetivu no progresivu ba mudansa pozitivu iha vida dezenvolvimentu nasaun nian”. Dehan Prezidente Komisaun Organizador Leonardo Benigno Tilman ba jornalista sira iha nia diskursu iha Jinaziu Desportu Díli Caicoli, Díli, Sábadu, 24/09/2022.

 Prezidente komisaun ne’e akresenta, Movimentu Juventude Mudansa Timor Leste kria atividade desportivu ho modalidade voleibol iha nasional  ida ne’e tanba sira iha vontade no interese hodi hametin unidade nasional.

 “Ita hein katak sei kompetetivu tebes ne’ebé  ikus mai klube ida mak sei manan nain, ne’ebe kompetisaun ami sei hala’o kada tinan, ne’ebé klube sira ne’ebé iha kompetisaun ne’e seida’uk iha oportunidade atu manan hein fali ba tinan sira tuir mai”. Tenik nia

Leonardo mos informa, Klube sira ne’ebé partisipa iha kompetisaun hamutuk  13,  Klink,  AD SLB ,Choque, CNE, Assalam,Uset, Atoni Ambeno, Academica, Juventude Tasitolu, Lalenok United , Bandido kualidade,Central Fatuhada no Loron Matan PNTL.

Nia hatutan,aktividade ne’e  hetan apoiu fundu montante 5,000 USD husi konseleiru maksimu  Movimentu Juventude Mudansa Timor Leste Ricardo Cardoso Neu.

Iha fatin hanesan konseleiru Maksimu Movimentu Juventude Mudansa Timor Leste Ricardo Cardoso Neu hatete, eventu ne’e importante tebes tanba juventude sira hatudu sira nia talentu liu husi modalidade voleibol.

“Eventu ne’e importante tebes tanba ita bele loke kompetisaun ba modalidade voleibol ne’ebé Timor Leste presiza eventu hanesan ne’e barak tanba juventude sira bele hatudu talentu ne’ebe nasaun barak dezenvolve liu desportu oi-oin tan ne’e mak voleibol ne’e importante maski foin dahuluk ami komesa maibé kada tinan ami sei realiza nafatin”. Nia salienta

Konseleiru ne’e fundamenta, Movimentu Juventude Mudansa Timor Leste sei apoiu nafatin hodi realiza eventu ne’e kada tinan tanba desportu husi modalidade Voleibol importante iha Timor Leste.

Jornalista: Augusto dos Santos

Editor: Ekipa Editorial