Sekretáriu Jerál ONU Sei Komunika Ho Lider Nasaun Sira Apoia Adezaun TL Ba ASEAN

SAPNewsTL, Nova Yorke : Hafoin hasoru malu ho Prezidente Repúblika José Ramos Horta, Sekretariu Jerál Organizasaun Nasões Unidas (ONU), António Guterres afirma sei ko’alia ho líder mundiál sira, lider nasaun membru G20 hodi apoia adezaun Timor-Leste bá Association of Southeast Asian Nations (ASEAN).

Xefe Estadu ne’e hateten, António Guterres iha relasaun metin ho atuál Prezidente Indonézia, Jokowi, nune’e nia bele negosia hodi Timor-Leste adere lalais ba ASEAN.  

 “Nia (António Guterres) relasaun metin ho Prezidente Repúblika Indonézia, Joko Widodo, nu’udár mós Prezidente ba ASEAN no G20 iha tinan 2023, ne’e duni ita presija buat ruma husi Sekretáriu Jerál ko’alia ho líder Europeiu sira no G20, nia prontu atu halo loby ba Timor-Leste, nia sempre rai Timor-Leste iha nia ulun no fuan,” dehan PR Ramos-Horta, hafoin enkontru ho Sekjer ONU, António Guterres. 26 Setembru 2022

Entretantu, Prezidente José Ramos Horta konsidera, Sekretáriu Jerál ONU, António Guterres sempre prontu atu haré saida mak Timor-Leste presija nia apoiu, bele dala ruma apoiu diretamentu husi ONU maibé mós bele liu husi ko’alia ho líder sira iha mundu tau matan ba Timor-Leste.

Xefe Estadu fundamenta, Sekretáriu Jerál ONU, hanesan ema ida di’ak tebes, líder ne’ebé iha kualidade no koñesidu hanesan ema relijiozu, nu’udár Katóliku dezde hanesan Primeiru Ministru Portugál, iha fuan di’ak tanba ne’e mak eleitu hanesan lideransa máximu ONU ho unanimidade tutuir malu.

Nia sublinha, Uluk iha tempu difísil 1999, hanesan Primeiru Ministru Portugál, António Guterres halo pressaun makas ba Prezidente Amerikanu, Bill Clinton no líder Europeiu sira atu buka konsensu iha Konsellu Seguransa ONU, nune’e Misaun Forsa Manutensaun ba Dame INTERFET tama iha Timor-Leste.

Iha enkontru ne’e, Sekeretariu Jerál ONU apresia mós Xefe Estadu foun Timor-Leste ba períodu 2022-2027, José Ramos-Horta.

Enkuantu, Iha Amérika, Prezidente Repúblika hasoru malu ona ho Primeiru-Ministru Kambodia, Hun Sen, primeira Ministra Nova Zelándia, no líder mundiál sira seluk hodi ko’alia mos kona-ba prossesu Timor-Leste adere ba ASEAN.

 Jornalista : Vinsensius Saldanha

Editor    : Luis Pailofo