Khamenei Mate, Irán Lansa Míssil Ba Israel, Rezulta Ema Na’in 9 Mate, 28 Sofre Kanek

Sapnews Pro : Relativamente ho funu iha médiu oriente, Iran lansa míseis iha área rezidénsial Beit Shemesh (Sentru Israel) rezulta ema hamutuk na’in 9 lakon vida no 28 sofre kanek.

Hafoin Líder Supremu Ayatollah Ali Khamenei mate iha atake konjuntu husi Israel–EUA. Iran lansa míseis iha área rezidénsial Beit Shemesh no Tel Aviv rezulta ema na’in lakon vida no sofre kanek.

“Ema na’in sia mate iha atake míseis Irán nian hasoru sidade Beit Shemesh, Irán kontinua halo atake retaliasaun hasoru Israel no alvu militar Estadus Unidos iha nasaun barak iha Rejiaun Médiu Oriente”. Sita média Al Jazeera EnglishEnglish, 01/03/2026.

Residente sira iha Tel Aviv relata katak sira rona eksplosaun boot husi sistema defeza ne’ebé halo intersesaun. Hafoin akontesimentu, servisu resgate Israel nian konfirma ema nain sia mate no ema nain 28 kanek iha Beit Shemesh.

“Ita-boot sira liu tiha ami nia linha mean no presiza selu ho folin,” hateten Prezidente Parlamentu Irán nian, Mohammad Bagher Ghalibaf, iha diskursu televizaun iha Domingu.

Militar EUA relata la iha vítima husi parte EUA no estraga infraestrutura ki’ik deit, maski sira hateten katak iha “atake míseis no drone husi Irán”.

Militar Israel hateten Irán lansa “dezenas” míseis ba teritoriu Israel, no barak husi ne’e hetan intersesaun ho susesu.

Iha sorin seluk, servisu emerjénsia Magen David Adom konfirma katak feto ida iha rejiaun Tel Aviv mate tanba kanek ne’ebé nia hetan durante ofensiva míseis Irán nian.

Entretantu, Prezidente Estados Unidos, Donald Trump, informa guerra kontra Irán bele dura to’o fulan ida. Deklarasaun ne’e sai hafoin Washington anunsia katak sira destrui sede prinsipal Guarda Revolusionária Irán nian, no Israel afirma operasaun konjunta ne’e fó “golpe grave” ba sistema komandu no kontrolu Teerán nian.

“Ha’u foin simu informasaun katak ami destrui no afunda ona naviu guerra Irán nian hamutuk 9, balu boot no importante tebes. Ami sei kontinua buka sira seluk, iha tempu badak, sira mós sei flutua iha tasi nia kraik!” Hakerek Presidente EUA Donald Trump iha rede sosial, 02/03/2026

Iha entrevista ida ho Daily Mail, Trump dehan operasaun militar ne’e bele la’o durante semana haat. “Prosesu semana haat. Irán mak nasaun boot, entaun bele lori semana haat ka menus,” dehan Trump.

Nia mós sublinha katak EUA sei nafatin loke dalan ba negosiasaun ho Irán, maibé la konfirma, se dialogu ne’e sei akontese iha tempu badak.

Konflitu ne’e aumenta inserteza iha Rejiaun Oriente Médiu no ekonomia global, liu-liu hafoin relatu kona-ba mate Ali Khamenei, Lider Máximu Irán nian. Setor transporte marítimu, aviasaun no merkadu mina-afetadu tebes ho eskalada militar ne’e.

Ofisial EUA rua ne’ebé ko’alia ho Reuters ho kondisaun anonimatu hatete katak militar EUA mate iha baze ida iha Kuwait. Trump admite katak sei bele iha tan vítima, no promete atu halo vingansa.

“Amerika sei vingasa morte sira ne’e no sei fó kastigu maka’as liu ba terrorista sira ne’ebé halo guerra hasoru ema sivilizasaun,” dehan Trump iha mensajen vídeo.

Sondajen Reuters/Ipsos hatudu katak apenas ida husi ema haat iha EUA mak apoia operasaun militar ne’e. Taka Estreitu Hormuz – dalan prinsipal ba 20% fornesimentu mina mundiál, bele halo presu mina sa’e maka’as, afetandu konsumidor iha EUA no nasaun seluk.

Desafiu Existensiál Ba Irán

Militar Israel hatete katak forsa aerea Israel nian domina espasu aéreu iha Teerán no halo atake ba sentru intelijénsia, seguransa no komandu militar.

Irán liu hosi Guarda Revolusionária, afirma katak sira ataka naviu mina EUA no Reino Unido iha Golfo no Estreitu Hormuz, no uza drone no míssil hasoru baze militar iha Kuwait no Bahrain. Dadus transporte marítimu hatudu atus naviu para besik iha tasi, ho previzaun presu mina sei sa’e iha merkadu internasionál.

Transporte aéreu global mos hetan perturbasaun boot, tanba aeroportu prinsipal sira iha Oriente Médiu taka temporariamente, inklui Dubai, ne’ebé konsideradu hanesan sentru aviasaun internasionál movimentadu liu iha mundu.

Iha Irán, Prezidente Masoud Pezeshkian hatete katak konsellu lideransa temporáriu kompostu hosi nia rasik, xefe judisiál no membru Konsellu Guardando, simu responsabilidade Lider Máximu nian durante períodu tranzisaun.

Ministru Negósiu Estranjeiru Irán nian, Abbas Araghchi, sublinha katak Teerán loke dalan ba deseskalada, maibé mos afirma katak Irán prontu kontinua kombate. “Bombardeamentu iha kapital la afeta ami-nia kapasidade atu halo guerra,” nia hakerek iha rede sosial X.

La Iha Resposta Simples Ba Futuru

Trump konvida povu Irán atu derruba governu sira nian, maibé senadór sira iha EUA hatete katak mudansa rejime la fasil atu akontese liu deit hosi atake aéreu.

Senadór Republikanu Tom Cotton dehan katak la iha resposta simples kona-ba saida mak sei akontese tuir mai. Enkuantu senadór Lindsey Graham afirma katak povu Irán rasik mak tenke deside sira-nia lideransa.

Konflitu ne’e tama ona loron daruak. Trump afirma katak 48 lider Irán nian mate, no militar EUA hahú afunda marinha Irán nian, ho naviu guerra sia mak estragadu. Militar EUA mos konfirma katak mais de 1.000 alvu iha Irán mak atakadu, inklui instalasaun míssil iha rai-okos ne’ebé bombardeadu ho avion B-2 stealth.

Retaliasaun Irán nian mos hahú fó impaktu. Militar EUA konfirma katak militar tolu mate no lima seluk hetan kanek grave iha operasaun hasoru Irán, enkuantu balu seluk sofre kanek ki’ik tanba estilha.

Situasaun iha rejiaun kontinua tensu, ho komunidade internasionál husu atu halo deseskalada lalais hodi prevene konflitu ne’ebé bele sai boot liu tan.

Primeiru-Ministru Israel, Benjamin Netanyahu fo agradese ba Presidente EUA Donald Trump tanba susesu bombardeia Iran.

Netanyahu haktuir “Israel no Estadus Unidos hahú operasaun ida atu hasai ameasa ezistensiál ne’ebé mai husi rejime terrorista iha Irán.

“Ha’u agradese ba ami nia belun boot, Prezidenti Donald Trump, tanba nia lideransa istórika”.

Durante tinan 47, rejime aiatolás sira hakilar ‘Mate ba Israel’ no ‘Mate ba América’. Sira fakar ami-nia ran, oho ema Amerika barak, no halo masakre ba nia povu rasik.

Rejime terrorista no oho-ema ne’e la bele f autoriza atu arma an ho kilat nukleár ne’ebé bele fó sira kapasidade atu ameasa umanidade tomak.

“Ami-nia asaun konjunta sei kria kondisaun atu povu Irán ne’ebé korajoju bele kaer sira-nia destinu iha sira-nia liman rasik”.

Tempu to’o ona ba grupu hotu-hotu iha Irán : persa, kurdu, azeri, balúchi no ahwazi sira, atu hasai an husi tirania no hari’i Irán ida ne’ebé livre no buka dame.

“Ha’u apela ba imi, sidadaun Israel sira, atu tuir orientasaun husi Komandu Frente Interna. Loron sira tuirmai husi Operasaun Leão Rugidor sei husu pasiénsia no firmeza husi ita hotu. Ita sei hamutuk nafatin, luta hamutuk, no garante Israel nia eternidade”.