Xanana Husu Foinsa’e Reza, Estuda, Labele Estraga Malu & Lori Timor Ba Oin
Imajem : PM Xanana Gusmão iha Ainaro, 07/03/2026. Foto : Média PM
SAPNewsTL, Ainaro : Hafoin entrega estatua nossa senhora de fátima no krúz bá sarani sira, PM Xanana Gusmão husu foinsa’e sira atu labele tama grupu oioin hodi estraga malu maibé hamutuk reja hodi hadomi malu, haka’as a’an hodi lori rai ne’e ba oin.
Primeiru-Ministru (PM), Kay Rala Xanana entrega estatua nossa senhora de fátima no krúz bá sarani sira iha Kapela Ave Maria Fleixa, suku Aitutu postu administrativu Maubisse, munisípiu Ainaro.
Xefe Governu Xanana Gusmão hato’o agradese hosi laran ne’ebé kle’an bá populasaun Aitutu tanba bele konvida hodi vizita sira-nia fatin.
“Ha’u haree de’it imi halo ha’u sente nafatin katak ita ukun a’an besik tinan-24 ona maibé Estadu, ami ne’ebé kaer Governu seidauk kumpri ami-nia obrigasaun atu hadi’a imi-nia moris. Imi mak erói, ho imi-nia terus, imi-nia sakrifísiu maka ita hetan ukun a’an ne’e. Tanba ida ne’e ha’u agradese no mai hasoru imi iha ne’e. Ha’u bá fatin barak ona katuas ferik sira balun laiha ona, hasoru de’it sira-nia oan,” PM Xanana hateten iha Aituto, Ainaro, 07/03/2026. Sita média GPM
Governante ne’e husu bá foinsa’e sira atu hanoin de’it mak estuda, tanba ferik-katuas sira laiha hotu tiha fain-sa’e sira mak sei kaer rai ida-ne’e.
“Ha’u kontente tebes tanba imi (joven) mak serbisu iha imi-nia kapela ne’e. Labele tama grupu oioin hodi oho malu de’it, estraga malu de’it. Maibé mai hamutuk reja hodi husu ba ita nia rai-na’in, lulik sira no maromak tulun ita hadomi malu, haka’as a’an hodi lori rai ne’e ba oin”, nia dehan.
Xefe Governu orienta mós Ministru Obras Públikas (MOP), Samuel Marçal atu haruka tékniku hosi Ajénsia Dezenvolvimentu Nasionál (ADN) tun direta halo kálkulasaun bá materiál ne’ebé presiza atu finaliza konstrusaun no rehabilitasaun bá kapela ne’e.
Kapela ne’e konstrui hosi kontribuisaun voluntária sarani sira desde tinan 2023 maibé seidauk finaliza tanba kbi’it la to’o.
Xefe Suku Aitutu, Grégorio Pereira lori sarani sira-nia nia naran hato’o agradese bá PM Xanana tanba vizita no haree direta sira-nia kapela.
“Ami agradese bá prezensa Primeiru-Ministru iha suku Aitutu hodi haree mós kondisaun Kapela Ave Maria Fleixa. Ami rekomenda atu ajuda netik ami hodi ami finaliza tiha konstrusaun ne’e,” nia agradese.
Kruz ne’e oferese hosi Timor-oan Abio Salsinha no estatua ne’e oferese hosi Ministra Saúde (MS), Élia dos Reis Amaral ne’ebé sosa hosi Portugal.
Primeiru-Ministru to’o iha kapela Ave Maria simu hosi lia-na’in, estudante no sarani sira ho kultura Mambae nian, kontinua kedan look bua-malus.
Primeiru-Ministru ho Ministru Obras Públikas fahe mós sasan, kadernu no kampaña bá ferik, katuas, labarik, estudante no foin-sa’e sira.
Foto : Média PM
#Ainaro #Xanana #timorleste
