Ámbitu Idul-Fitri 2026, Telkomcel Hala’o Asaun Solidáriu Ba Musulmanu Sira
Imajem : Espesial
SAPNewsTL, Dili : Operador Telekomunikasaun Telkomcel implementa programa Responsabilidade Sosial Korporativa liu hosi apoia fundus no ai-han ba komunidade musulmanu hodi selebra loron Idul-Fitri tinan 2026.
Programa ne’e realiza liu husi distribuisaun doasaun ba musulmanu sira iha Timor-Leste, ne’ebé hala’o iha Meskita An-Nur iha Dili no munisipiu 12.
Marciana Conceição – SAPNewsTL
Vise Prezidente Telkomcel Herlian Sales hateten, programa ne’ebe hala’o atu lori ksolok no hametin espíritu relasaun entre musulmanu sira ne’ebé selebra loron Idul-Fitri tinan 2026.
“Liu-husi atividade ida-ne’e, Telkomcel hein atu lori ksolok no hametin espíritu hamutuk entre ita-nia maun-alin musulmanu sira ne’ebé selebra Idul-Fitri 2026. Ami hakarak hametin nafatin valór solidariedade nian no kuidadu malu iha Timor-Leste”. Dehan VP Telkomcel Herlian Sales iha Masjid An-Nur Kampung-Alor, 06/03/2026.
Ba Telkomcel, atividade ne’e la’ós atividade rutina de’it durante tempu feriadu. Ida-ne’e parte ida hosi kompromisu ba tempu naruk empreza nian atu kontinua partisipa, fahe no fó kontribuisaun ba bem-estar komunidade.
Tama ba tinan 14 operasaun iha Timor-Leste, Telkomcel la’ós de’it foka ba servisu telekomunikasaun exelente maibé mós kompromete atu fó impaktu pozitivu ba dezenvolvimentu sosiál nasaun nian.
Liu-husi espíritu “Servi Ho Domin” (Melayani dengan Kasih), Telkomcel esforsu nafatin atu hari’i relasaun ne’ebé harmonia ho nivel hotu-hotu sosiedade nian. Kuidadu sosiál nu’udar valór prinsipál ne’ebé mantein husi empreza nu’udar forma ida husi ninia papél ativu hodi apoia progresu sosiál iha Timor-Leste.
Tinan 2026, Telkomcel distribui asisténsia RSE ho totál $5,000 USD, to’o iha distritu 12 iha Timor-Leste. Asisténsia hirak ne’e mak hanesan :
- Pakote ai-han báziku, atu ajuda hatán ba nesesidade ai-han loron-loron nian.
- Asisténsia osan, atu apoia bem-estar família sira ne’ebé simu.
- Ekipamentu adorasaun, espesifikamente fornese atu apoia atividade relijioza sira hosi estudante internatu islámiku.
