Sorumutu Ho PM Xanana, Emerge Foundation Austrália Sei Fo Bolsa Ba Timoroan

‎

Imajem : Primeiru Ministru Kay Rala Xanana Gusmão sorumutu ho Liderança Emerge Foundation Australia Limited iha Palasiu Governu Díli, 13/03/2026. Foto : Média PM 

SAPNewsTL, Dili – Hafoin sorumutu ho Primeiru Ministru Kay Rala Xanana Gusmão, Emerge Foundation Australia Limited hakarak atu oferese bolsu estudu bá Timor-oan sira ne’ebé iha interese atu kontinua estudu iha área saúde.

‎‎Prezidente Emerge Foundation Australia Limited, Ian MacRitchie deklara ‎Fundasaun Emerge hakarak oferese bolsu estudu sira, liu-liu bá feto foin-sa’e sira, atu kontinua estudu iha universidade hodi sai professór no enfermeiru.

‎‎“Ami iha domin bo’ot bá Timor. Tanba ne’e mak ami hasoru-malu ho Primeiru-Ministru ha’u-nia belun di’ak Xanana Gusmão. Nia ema ida ne’ebé notável tebes. Nia mak Nelson Mandela Timor nian ne’ebé fó-an tomak bá luta independénsia nasaun ne’e nian,” Dehan Ian MacRitchie iha Palasiu Governu Dili, 13/03/2026.

‎‎Fundasaun ne’e tama TL desde tinan 21 liu-bá no fó sasin katak uluk la hanesan ho agora, tanba dezenvolvimentu la’o makas.

‎‎Ian MacRitchie kongratula Timor-Leste ninia mudansa signifikativu no espresa sentimentu kontente bele hola parte mós iha prosesu ne’e liu-hosi kooperasaun sira ne’ebé iha.

‎‎Emerge Foundation Australia Limited nia misaun maka fornese oportunidade edukasionál bá labarik sira iha sosiedade ne’ebé ekonomikamente fraka.

‎‎To’o ohin loron Foundation Australia Limited kontinua apoiu bá Institutu Katólika Formasaun Professores (ICFP) Baucau iha Timor-Leste, Programa Maternal Childcare, Juventude iha Baucau no mós programa Tranzisaun Veteranus Australianu.