José Honório Figura Ne’ebe Loyal, Simples & Responsável
Imajem: Matebian Ministru Ensinu Superiór Siénsia no Kultura José Honório Jerônimo. Foto: Média MESSC
SAPNewsTL, Dili : Hafoin hetan atakasaun, Ministru Ensinu Superiór Siénsia no Kultura (MESSK) José Honório Jerônimo hakotu iis iha Ospital Nasionál Guido Valadares (HNGV), Sekretariu Estadu Floresta (SEF) Fernandino Vieira sente lakon belun ida ne’ebé iha prestasaun servisu no loyalidade ba nia servisu ba povu no nasaun Timor-Leste
Matebian Ministru Ensinu Superiór Siénsia no Kultura Josè Honório asume kargu nu’udar Ministru Ensinu Superiór Siénsia no Kultura(MESSK) iha IX guvernu konstitusional no iha Partidu Demokrátiku laran nia hanesan Prezidente Partidu Demokrátika munisípiu Liquiça.
SEF Fernandino Vieira hateten, nia parte sente lakon Ministru José Honório Jerônimo ne’ebe simples, kalma, loyal no responsabilidade ba ninia knar ho ninia enerjia, kapasidade no tempu tomak.
“Nia ema ne’ebé kalma no sempre responsabilidade ba nia servisu, besik tinan tolu nia laran ami hamutuk iha IX guvernu konstitusional, nia nafatin hatudu prestasaun servisu no hatudu loyalidade ba nia superiór”. Dehan Sekretariu Estadu Floresta Fernandino Vieira ba SAPNews iha HNGV, 21/04/2026.
Sekretáriu Estadu afirma, antes ne’e nia hasoru malu ho matebian MESSK iha munisípiu Maliana no hare’e katak nia iha kondisaun fiziku no saúde ne’ebé maka di’ak hodi hala’o nia kna’ar maibe la espera nia hetan atakasaun no lakon vida.
“Ami hasoru malu ikus iha serimonia partidu nian iha Maliana, ami hase malu no sei koalia, ami hare’e katak nia iha kondisaun fiziku no saúde ne’ebé maka diak tebetebes hodi hala’o servisu”.
“Maibe, ohin loraik derepente rona dehan nia hetan atakasaun no fila hikas ba Aman Maromak”. Nia informa
Fernandino Vieira akresenta, hanesan kuadras militantes Partidu Demokrátika sente triste tanba lakon ema ne’ebé iha dedikasaun no responsabilidade ba servisu.
“Ami hanesan kuadras militantes superior iha Partidu Demokrátiku, ami sente laran triste liu-liu iha membru guvernu, IX guvernu konstitusional lakon ema ne’ebé maka iha dedikasaun no responsabilidade servisu ba edukasaun”. Nia subliña.
Sekretariu Estadu Fernandino Vieira hatutan, “Nia ema ida ne’ebé kalma, disiplina no nia iha intelektualidade, durante ami hamutuk nia ema ne’ebé sempre hatudu nia loyalidade ba nia superiór, tantu iha guvernu no partidu laran”.
Mensajen ne’ebé matebian José Honório sempre koalia hanesan belun no kuadru superiór iha Partidu Demokrátiku laran, “fo ita-nia dedikasaun tomak no kontribuisaun ba estadu no nasaun hodi servi povu ida ne’e”.
Maktoban Ministru Ensinu Superiór Siénsia no Kultura (MESSK) José Honório da Costa Pereira Jeronimo, moris iha Bazartete, munisípiu Liquiçá iha 15 fulan-fevereiru 1973.
Iha Tinan 2001, gradua iha Estudu Dezenvolvimentu hosi Institutu Teknolojia no Siénsia Mandala Indonézia. Hetan títulu Mestradu kona-bá Estudu Dezenvolvimentu iha Universidade Kristen Satya Wacana, Salatiga, Indonézia, iha 2010.
Tinan 2001 nu’udár dosente iha Fakuldade Ekonomia, Departamentu Estudu Ekonomia no Dezenvolvimentu, iha Universidade Nasionál Timor-Leste (UNTL).
Assume kargu xefia oin-oin iha UNTL mak hanesan Xefe Departamentu Ekonomia no Estudu Dezenvolvimentu (2004-2006), Dekanu Fakuldade Ekonomia (2006-2008), Vise-Dekanu Asuntu Estudante iha Fakuldade Ekonomia no Jestaun (2011-2013), Reitór Administrasaun no Finansas (2016-2020) no Pro-Reitór Inspesaun, Auditoria no Kontrolu Kualidade (2021-2023).
José Honório mos nu’udar membru Konsellu Jerál UNTL hosi 2015 to’o 2016. Hala’o kna’ar nu’udár Adidu Komérsiu iha Embaixada Repúblika Demokrátika Timor-Leste iha Jakarta, Indonézia (2013-2015).
Iha tinan 1994, sai hanesan membru organizasaun estudante Rezisténsia Nasionál Estudante Timor-Leste (RENETIL) ne’ebé harii iha tinan 1988 hosi estudante timoroan sira iha Indonézia ho objetivu atu luta bá independénsia Timor-Leste nian.
Iha loron 1 fulan-jullu tinan 2023, simu pose nu’udár Ministru Ensinu Superiór, Siénsia no Kultura iha IX Governu Konstitusionál, hodi sai responsável bá konsesaun, ezekusaun, koordenasaun no avaliasaun polítika nian iha área sira ensinu superiór no kualifikasaun nian, no mós área siénsia no teknolojia. Universidade Nasionál Timor-Leste, Institutu Politékniku Betano, Institutu Nasionál Siénsia no Teknolojia, no Ajénsia Nasionál bá Avaliasaun no Akreditasaun Akadémika, I.P., iha ninia autoridade nia okos.
