MdS Lakon Vida ! PNTL Kaer Kazál Na’in 2 Ho Bebê Tama Prizaun
Imajem : Kazál na’in 2 Ho bebê ne’ebe PNTL asegura. Dili, 20/04/2026. Foto : Média PNTL
Sapnews Pro : Autoridade Seguransa Diresaun Servisu Investigasaun Kriminal (DSIK), Polísia Nasionál Timor-Leste (PNTL), ezekuta mandadu Tribunal Judisial Primeira Instansia Dili (TJPID) detein kondenadu kazál na’in rua inan nurak ho naran inisial HX ho MB lori ba kumpri sentensa sala iha prizaun Becora no Gleno
Tuir publikasaun hosi Página Ofisial PNTL sublinha katak Kazál Na’in rua komete kazu krime Violénsia Domestika akontese iha loron 17 fulan Marsu tinan 2023, iha aldeia, Laloran, Suku Bairo Pite, Postu administrativu Dom Aleixo Munisípiu Dili, ikus mai halo tratamentu iha HNGV maibé la konsege salva nia vida.
“Kazál na’in rua komete kazu krime Violénsia Domestika hasoru vitima lezada inisial Mds to’o baixa iha Hospital Nasional Guidu Valadares (HNGV) lakonsege salva nia vida ne’ebé previstu iha kodigu penal tipu krime iha artigu 146 Ofensa ba integridade fizika maka’as hasoru lezada to’o lakon vida”. Hakerek página PNTL. Dili, 20/04/2026
Nune’e iha loron 20/04 tuku 09:30, Autoridade Seguransa Diresaun Servisu Investigasaun Kriminal (DSIK) simu ordem hodi ezekuta mandadu Tribunal Judisial Primeira Instansia Dili (TJPID) ho numeru rejistu NUK : 0161/23.DICMR hodi halo detensaun no lori ba kumpri iha Prizaun Becora no Gleno.
Nune’e ida ezekusaun mandadu dahuluk detein suspeitu ho inisial; HX idade 45 iha Aldeia Laloran, Suku Bairo Pite, postu administrativu Dom Aleixo Munisípiu Dili lori ba prizaun.
“Kondenadu HX sei kumpri nia sala durante tinan 7 no kondenadu inisial MB idade 41 inan nurak iha Fatuquero, postu administrativu Gleno Munisípiu Ermera lori ba prizaun sei kumpri nia sala iha prizaun durante tinan lima”.
Iha prosesu ezekuta mandadu Tribunal Judisial Primeira Instansia Dili (TJPID) la’o ho diak, tanba suspeitu kazál nain rua, inan nurak ho nia bebe foin halo fulan rua kopera diak ho ekipa Diresaun Servisu Investigasaun Kriminal (DSIK) hodi lori ba kumpri iha prizaun.
