TL : Husi Loron 25-27 Abril, Lafaek Tata Mate Ema Na’in 3 Inklui Labarik Feto 1

Imajem: Sidadaun nain tolu kompostu husi labarik feto ida, joven mane nain rua ne’ebé lafaek tata mate iha munisípiu Lautem & Manufahi. Foto: SMPC-GRDN & Paya Ressi

SAPNews Pro : Sidadaun na’in tolu (3) kompostu hosi labarik feto ida, joven mane na’in rua iha munisípiu Lautem no Manufahi ne’ebé lafaek tata too lakon vida. Vítima na’in rua ne’e la konsege hetan nia isin lolon kompletu, vítima labarik refere hetan ho isin lolon kompletu no família mós oho lafaek ne’ebe tata.

Tuir publikasaun hosi Serviços Munisipais de Proteção Civil e Gestão Riscos Desastres Naturais (SMPC-GRDN) munisípiu Manufahi haktuir katak vítima hetan tata hosi Lafaek, wainhira soe dai ba bee iha Betano, Same, munisípiu Manufahi.

“Tito ba hakael ka soe daí iha bee inan Nu’utur hodi kaer ikan. Akontesimentu ne’e iha loron 27 Abril 2026”. Manufahi, 28/04/2026. Segundu SMPC-GRDN.

Hafoin akontesimentu, equipa resgate kompostu hosi Autoridade Protesaun Sivil, Bombeiros, Forsa F-FDTL Naval, Polícia no komunidade buka tuir vítima nia isin mate to’o kalan la hetan no foin hetan fali iha oras besik Meudia (12:00 pm), loron 28 Abril 2026.

“Equipa resgate konsege hetan deit vítima nia roupa hanesan faru no sepatu, nia da’i no orgaun isin nian hanesan ten boot no ten talin no lori ona ba uma vítima nian”.

Iha sorin seluk, akontese mós lafaek Tata sidadaun mane ida iha postu administrativu Lospalos, munisípiu Lautem iha loron 25 Abril 2026 no tata labarik feto ida ho naran Ticia iha munisípiu Lautem, iha loron 27 Abril 2026.

“Ohin loraik tuku 15:30, Avo Lafaek tata ha’u-nia Aluna Klase 1, oan Husi Marto no Analia iha nia uma kotuk ne’ebe lokaliza besik tasi-ibun Lautem, foin mak hetan Nia isin mate. Hakmatek iha onia mundo foun Ticia”. Hakerek Sidadaun Paya Ressi iha loron 27/04/2026