Servisu Ho Kondisaun Moras, Adolfo Hakotu Iis Iha Edifisiu MTA
Imajem : Adolfo Soares ne’ebe hakotu iis iha Edifício Ministério Turismo e Ambiente, Farol, 01/05/2026
SAPNewsTL, Dili : Servisu ho kondisaun moras, Traballador Seguransa Sivil Adolfo Soares hakotu iis derrepente iha edifisiu Ministeriu Turizmu no Ambiente (MTA) Farol, Dili.
Daniel da Silva – Sapnews Pro
Adolfo Soares servisu nu’udar seguransa sivil iha DNSPP, iha ne’ebe halo papel hanesan fo kontrolu no halo seguransa ba edifisiu instituisaun estatal sira lorloron tuir horáriu kalan no loron iha Ministeriu Turizmu no Ambiente.
Tuir informasaun ne’ebe SAPNewsTL asesu husi sasin iha lokal akontesimentu haktuir katak Adolfo Soares servisu ho kondisaun moras, la espera vitima hakotu iis derrepente iha servisu fatin.
Vitima mate ho kondisaun moras no tur sadere hela ba kadeira ne’ebe nia uza iha knaar fatin, edifisiu Ministeriu Turizmu no Ambiente Farol, Dili, 01 Maiu 2026 maiz ou menuz tuku 7:00 kalan.
Hafoin traballador ida ba fatin akontesimentu atu troka nia hodi servisu iha oras kalan nian maka hetan nia ho kondisaun laiha ona iis, nune’e sasin ne’e kontaktu kedas ba nia maluk seguransa sivil sira no parte Polisia Nasional Timor-Leste (PNTL).
Tuir mai, parte seguransa PNTL to’o kedas iha lokal kazu hodi halo identifikasaun, kolleta informasaun no komunika ho família molok translada mate isin ba Mortuáriu Hospital Nasional Guido Valadares (HNGV) hodi halo ezaminasaun ba nia mate isin, molok entrega ba família.
Matebian origem hosi Postu Administrativu Letefoho, Munisipiu Ermera, Adolfo Soares mate iha ambitu loron mundial traballador, mate ho kondisaun moras no husik hela fen no oan mane na’in tolu (3).
Dili, 01 Maiu 2026.
