Familia Vítima Deklara Kazu Omesidu Iha Kuluhun Kauza Hosi Disputa Rai La’os Problema Artes Marsiais
Imajem: Familia vítima kazu omesidu oho Contansio Saldanha Bere iha Culuhun, 30/05/2026. Foto: SAPNewsTL.
SAPNewsTL, Díli : Familia vítima kazu omesidu (oho Contansio Saldanha Bere) iha Kuluhun realiza hodi klarifika no deklara katak kazu refere akontese tanba kauza hosi problema disputa rai entre familia rua la’os problema artes marsiais.
Marciana da Conceição & Leonel Alves da costa – Sapnews.com
Porta voz Moises Alves informa, familia vitima husi matebian Contansio Saldanha Bere, hakarak klarifika ba publiku katak ami-nia oan ne’ebe hetan Oho Mate, akontense iha loron sexta dia 29 de maio de 2026. Oras tuku 2:00 madrugada iha Fatin Aldeia Toko Baru, Sucu Culuhun.
“Vítima oho husi Autor sira inisia A, A no A ho nia grupo sira ne’ebe koncesentra iha uma kain 2, hafoin hodi mai ta’a mate Contansio Saldanha Bere iha ninia Kuartu Laran”. Informa Porta Voz Moises Alves iha Culuhun, 30/05/2026
Nia hatutan, molok akontese oho Constancio Saldanha Bere, iha tinan kotuk dia 22 de Setembro 2025 autor inisial A & A ta’a kanek uluk Valenti Menezes Alves Sladanha iha ulun kanek.
“Prosesu hotu iha ona Ministeriu Públiku nia liman maibe seidauk hetan julgamentu husi tribunal. Familia vitima ho suspeitu iha konflitu ba desintendimentu kona-ba baliza uma entre Vitima ho Susteitu”.
Problema desintendementu ne’e resolve ona iha autoridade Suku no Autoridades Terras e Proriedades, no hetan ona markasaun husi DNTT iha dia 22 de Maio 2026 maibe parte suspeitu la simu desizaun ne’e to’o mosu kazu omesidu.
“Liu tiha loron ida autor A no A ho sira nia aman Paul Soares, iha loron 23 de Maio 2026, halo ameasa ba Bernardo Saldanha Barros matebian nian aman katak ba Bernardo katak ami sei oho imi iha loron balu”. Nia konta
Iha loron ne’e kedas Bernado koordena ho Autoridade Lokal hodi ba hato’o keixa iha Esquadra Policia Becora. Maibe suspeitu sira la obedese ba autoridades sira. Liu tia situasaun sira ne’e, familia suspeitu sira muda tiha husi sira-nia uma inklui animal sira no sira-nia uma taka hotu.
“Ami familia la espera situasaun, ami sente desindentimentu sira hanesan problema baibain tanba ami mesak vizinhu deit. Ikus mai realidade hatudu oin seluk, afinal emar sira (suspeitu) halo hela planu hodi mai oho ami-nia oan”.
Iha fatin akontesimentu ne’e familia no PNTL asegura evidensia balun ne’ebe indika autor sira nia identidade pessoal. Evidensia hirak ne’e iha ona PNTL nia liman.
Familia Vitima husu ba parte hothotu, atu intende problema ne’ebe akontese iha Aldea Culuhun Toko Baru, Sucu Culuhun, “Problema la’os grupu ka organizasaun ruma maka ataka malu, maibe problema refere liga ba rai-ketan ou baliza rai no uma fatin”.
Autor kriminozu sira maka utiliza sasan ou materiais organizasaun nian hodi mai asaltu, ho atitude imoral sira hanesan ne’e maka hafoer imagen organizasaun nian iha komunidade nia le’et.
“Husu ba parte responsaveis hotu husi Organizasaun Artes Marciais, no Rituais sira ne’ebe existe iha RDTL atu organiza no fo motivasaun diak ba elementus sira. Nune’e fo fila fali konfiansa ba estadu no kontribui ba paz no dezenvolvimentu”.
Familia vítima, Bernardo Saldanha Barros nu’udar aman ba matebian husu ba autoridade judisial hodi prosesa kazu ne’e ba oin ho lais tuir lei ne’ebe vigora iha Timor-Leste.
“Ami familia husu ba autoridade siguransa estadu atu halo prosesu kondenasaun tuir lei ne’ebe vigora iha ita-nia rain. Ami familia vitima la kohi simu tan Paul Soares ho nia oan autor sira, lalika mai hela tan iha fatin ne’e”. Nia deklara.
Oras ne’e suspeitu na’in-3 iha ona autoridade seguransa nia liman hodi halo investigasaun no submete ba Ministériu Públiku hodi prosesa tuir lei. Enkauntu mate isin iha ona nia rezidensia Suku Kuluhun Dili.
Tuir observasaun SAP News TL iha terrenu nota katak familia rua hela besik malu (vizinu), nune’e hafoin akontesimentu, familia vítima mós lamenta no halo kedas reasaun hodi tuda rahun vidru, odamatan no sobu suspeitu nia uma ne’ebe mamuk hela.
