Tasi Saudável & Futuru Seguru: Governu Lidera Ocean Parade 2026
Imajem: Guvernu hamutuk ho komunidade selebra Loron nasionál Tasi hodi realiza serimónia Desfile & Karavana Loron Nasionál Ocean Parade lao hahu husi tasi-ibun MNEK, Pantai Kelapa too Largo Lecidere, Sesta-Feira, 05/06/2026.
SAPNewsTL, Dili : Governu Timor-Leste selebra Loron Nasionál Tasi liu hosi programa karavana, limpeza jeral no atividade vital sira hodi hasa’e konsiénsia komunidade hodi proteze ambiente, biodiversidade, balada sira iha tasi no hadomi natureza.
Dircia Baptista – SAPNewsTL
Loron Nasionál Ocean Parade mak momentu importante ida atu hametin konsiénsia públika kona-ba importánsia tasi no rekursu marítimu sira ba moris no dezenvolvimentu sustentável.
Liuhosi serimónia desfile no karavana, governu hamutuk ho komunidade hatudu sira-nia kompromisu ba konservasaun ambientál, proteje ekosistema tasi no promove kultura kuidadu ba natureza iha teritóriu nasionál.
Selebrasaun reflete relasaun no kompromisu forte entre povu no tasi ne’ebé durante tempu naruk sai hanesan fonte moris, ekonomia no dalan ba realizasaun ekonomia azul. Tasi la to’o deit nu’udar fatin ba peska no transporte, maibé mos patrimóniu naturál ida ne’ebé presiza proteksaun husi ema hotu-hotu atu garante nia sustentabilidade ba jerasaun sira tuir mai.
Durante desfile no karavana, partisipante sira lori mensajen edukativu kona-ba proteze ambiente, kuidade tasi, labele oho ai-parapa, lenuk, no balada sira iha tasi no labele halo esplorasaun rekursu naturál ne’ebé la sustentável. Programa ne’e bele hasa’e konsiénsia públika atu reduz lixu plástiku, preserva biodiversidade marítima no apoia prátika ambiental ne’ebé responsavel no sensivel.
Ocean Parade mos sai plataforma ida atu hametin kolaborasaun entre parte interesada sira importante tebes atu dezenvolve programa no polítika ne’ebé bele asegura futuru tasi ne’ebé saudável no produtivu ba ema hotu.
Serimónia Desfile & Karavana Loron Nasionál Ocean Parade ne’e sai selebrasaun ida no kampaña nasional ida ne’ebe konvida sidadaun hotu-hotu atu sai parte husi movimentu proteksaun tasi ho espíritu unidade no responsabilidade hamutuk, ita bele preserva riqueza marítima Timor-Leste nian no hato’o legadu ida ne’ebé diak ba jerasaun sira iha futuru.
Selebrasaun ne’e partisipa hosi Prezidente Repúblika Jose Ramos Horta, Primeiru Ministru Kay Rala Xanana Gusmão, Vise Ministru Obras Públikas Julio do Carmo, Sekretariu Estadu Komunikasaun Sosial Expedito Dias Ximenes no membru governu sira sira.
