Empreza Timor Global & CCI-TL Inaugura Indústria Produsaun Maek Iha Ermera
Imajem : Lansamentu Produsaun Maek Iha Railaco, 16/07/2026.
SAPNewsTL, Ermera : Empreza Timor Global, Lda, hamutuk Câmara Comércio e Indústria Timor-Leste (CCI-TL) halo inaugurasaun ba indústria produsaun konjak (maek) iha Postu Administrativu Railako, Munisípiu Ermera.
Prezidente CCI-TL, Jorge Manuel Serrano, hato’o apresiasaun ba Timor Global tanba konsege investe iha área indústria no agronegósiu, maski hasoru dezafiu durante prosesu dezenvolvimentu investimentu.
“Apresia ba Timor Global tanba konsege investe iha área indústria no agronegósiu, investimentu hanesan ne’e la’ós buat fasil. Presiza korajen, finansiamentu no vontade boot. Timor-Leste presiza investimentu hanesan ne’e atu hamosu oportunidade ba povu no dezenvolve ekonomia nasional.” dehan Jorge Manuel Serrano liu husi diskursu, quinta-feira 16/07/2026.
Nia hatutan, Timor Global hahú investe iha área kafé husi tinan 2005 no agora kontinua espanda ba produsaun konjak.
“Timor Global hahú investe iha área kafé husi tinan 2005 no agora kontinua espanda ba produsaun konjak. Emprezáriu tenke hasoru risku. Investimentu boot la lori rezultadu lalais, maibé presiza tempu atu haree benefísiu.”
Prezidente CCI-TL konsidera investimentu privadu importante ba kresimentu ekonomia, no kria kampu servisu ba sidadaun sira.
“Se Timor iha investimentu mediu hanesan ida ne’e hamutuk 50 to’o 100, bele kria postu servisu entre 30 mil to’o 50 mil. Ida ne’e hatudu katak setór privadu iha papél importante ba dezenvolvimentu ekonomia.”
Nia Informa, IX Governu Konstitusionál, kontinua fó prioridade ba dezenvolvimentu setór privadu nasional no atrai investidór estranjeiru liuhusi parseria ho emprezáriu Timoroan.
“IX Governu Konstitusionál, ne’ebé lidera husi Primeiru-Ministru Kay Rala Xanana Gusmão, hakarak dudu setór privadu nasional no mos fó oportunidade ba investidór estranjeiru atu servisu hamutuk ho emprezáriu Timoroan.”
Jorge Manuel Serrano mós husu komunidade Railako atu proteje investimentu ne’ebé iha tanba bele kontribui ba ekonomia lokal no nasional.
“Investimentu ida ne’e la’ós de’it kria servisu, maibé mós ajuda tau produtu Timor iha merkadu globál. Tanba ne’e, komunidade tenke hametin konfiansa no proteje investimentu no kontribui ba ekonomia lokal.”
Relasiona ho direitu traballadór sira, Prezidenti CCI-TL informa, konsellu nasional traballu kontinua diskute kona-ba saláriu mínimu tanba valor atual seidauk sufisiente atu sustenta moris iha Timor-Leste.
“Ha’u hatene katak saláriu mínimu US$115 seidauk sufisiente. Diskusaun ida ne’e iha hela Governu no ha’u fiar sei iha desizaun di’ak ba traballadór sira tanba valor atual seidauk sufisiente atu sustenta moris.”
Jorge solisita komunidade no governu atu kontinua apoia investidór sira tanba sira-nia investimentu bele fó benefísiu ba agrikultór sira no promove dezenvolvimentu.
“Ita tenke apresia no apoia emprezáriu sira ne’ebé foti risku atu investe iha Timor-Leste, tanba sira-nia investimentu bele fó moris ba agrikultór sira no kontribui ba ekonomia nasional.”
Serimonia lansamentu no inaugurasaun ba indústria produsaun konjak (maek) iha Postu Administrativu Railako, Munisípiu Ermera. Serimónia ne’e partisipa husi Prezidenti Câmara Comércio e Indústria Timor-Leste (CCI-TL), Jorge Manuel Serrano, no autoridade relevante sira.
