Prevene Estudante Sai Vítima ! FOKUPERS Sensibiliza Matéria “Violénsia Bazeia ba Jéneru” Iha UNTL
Imajem : Edital
SAPNewsTL, Dili – Centro de Estudu Jéneru, Diversidade no Inkluzaun (CEGDI), Universidade Nasionál Timor Lorosa’e (UNTL), hamutuk ho FOKUPERS, hala’o atividade sensibilizasaun ba estudante sira ho tema “Hamutuk Asegura Kampus Seguru, Livre husi Violénsia Bazeia ba Jéneru (VBJ)”.
Antonina Lopes da Silva – SAP News TL
Dekanu Fakuldade Filosofia Siensia Humana (FFCH), Faustino Soares, hateten Universiade tenke sai espasu seguru ba ema hotu, la’ós deit fatin atu hetan aprendizajen akademiku.
“Estudante sira tenke iha korajen atu ko’alia sai bainhira hasoru hahalok ne’ebé viola direitu, dignidade no privasidade, Universiade tenke sai espasu seguru ba ema hotu, la’ós deit fatin atu hetan aprendizajen akademiku.” Dehan Dekanu (FFCH) Faustino Soares ba jornalista sira iha Salaun Auditorium FEG/UNTL Tersa-feira, 19/08/2026.
Ofisiál Advokasia FOKUPERS, Rio Soares, hatutan atividade ne’e hala’o bazeia ba Memorandu Entendimentu (MoU) entre FOKUPERS no UNTL, ho objetivu atu promove kampus livre husi VBJ no asédiu seksuál.
“Estudante sira presiza hatene mekanizmu denúnsia no prosesu referál, inklui prosesu disiplinár iha universidade no prosesu kriminal tuir lei ho objetivu atu promove kampus livre husi VBJ no asédiu seksuál.” Nia esplika
Nia haktuir, relasaun poder entre dosente no estudante bele sai barreira ba vítima sira atu hato’o keixa, tanba ne’e estudante sira presiza hatene sira-nia direitu no mekanizmu protesaun ne’ebé disponivel.
“Relasaun poder entre dosente no estudante bele sai barreira ba vítima atu hato’o keixa, tanba ne’e importante atu estudante sira komprende mekanizmu protesaun no denúnsia.”Nia Informa
Sensibilizasaun ne’e sei kontinua ba fakuldade sira seluk, inklui Fakuldade Ekonomia no Fakuldade Direitu, no sei fo ba dosente, pesoál administrativu, pesoál limpeza no seguransa.
Iha oportunidade hanesan Padre Lívio, argumenta, sensibilizasaun ne’e importante atu prevene abuzu iha kampus, no estudante sira presiza komprende mekanizmu sira ne’ebé UNTL iha atu simu no trata keixa.
“Sensibilizasaun ne’e importante atu prevene abuzu iha kampus, UNTL iha Gabinete Provedór Estudante, servisu akonsellamentu no estrutura ba igualdade jéneru atu fó apoiu no akompañamentu ba estudante sira ne’ebé hasoru problema.” Nia Salienta
Nia esplika, atividade ne’e la’ós deit atu fó informasaun, maibé mos atu kria ambiente universitáriu ne’ebé seguru no fó espasu ba estudante sira atu hato’o sira-nia problema.
“Objetivu la’ós deit atu fó informasaun téknika, maibé atu hari’i kampus ida ne’ebé seguru, saudável no iha espasu ba estudante sira atu ko’alia no hetan apoiu.” Nia Informa
Atividade ne’e ho objetivu atu hasa’e konsiénsia estudante sira kona-ba prevensaun no toleránsia zero ba abuzu no violénsia bazeia ba jéneru iha ambiente universitáriu.
