Oan Soru Deklara Finaliza Ona Dadus Reklamantes & Kontestantes Hamutuk 61.711
Imajem : Edital. Foto : MACLN
Sapnews Pro, Díli : Ministru Asuntu Kombatentes Libertasaun Nasionál (MAKLN), Gil da Costa Monteiro “Oan Soru” informa governu hamutuk ho Conselho dos Combatentes da Libertação Nacional (CCLN), finaliza ona prosesu análize no desizaun rekursu nian bá dadus reklamadus no kontestadus hamutuk 61.711 hosi munisípiu 12 inklui Oecusse.
“Foin konklui iha munisípiu Baukau, iha dia 21 Agostu. Dokumentu hotu-hotu mai ona iha Dili, hein para ekipa tékniku sira insert (hatama) bá Sistema baze de dadus,” Ministru “Oan Soru” informa asuntu ne’e bá Jornalista sira, hafoin partisipa iha enkontru konsellu ministrus ordinária iha Palásiu Governu, Dili, Kuarta (26/08/2026). Sita media MAKLN.
Governante ne’e hatutan, “seidauk inserta bá baze de dadus. Ita-boot sira hanoin, dala-ruma perguntas ne’e hanesan kartus. Mais, la hanoin 61 mill, 53 mill kazus, Reklamasaun ka Kontestasaun hamutuk 61 mill, hanoin de’it inserta bá baze de dadus ne’e, inserta ohin, aban hotu”.
“Entaun, durante ne’e ema sempre husu sasán repete. Nia la tétu, rihun hanesan ne’e, nia inserta bá Sistema baze de dadus, presiza loron hira?”. Nia prosesu ne’e, ida-ne’e hotu lai mak halo prosesu ka. Nia la hotu ne’e, halo prosesu bá saida?”, hatán Ministru “Oan Soru”.
Desizaun bá Rekursu ne’e, hala’o hosi Responsáveis Rezisténsia nian ho Konsellu Veteranus Munisipál nian iha kada munisipiu sira, ne’ebé mak ho baze bá Lei Númeru 3/2024, loron 12 fulan-Juñu, Teseira Alterasaun bá Lei Númeru 3/2006, loron 12 fulan-Abríl, kona-bá ESTATUTU KOMBATENTES LIBERTASAUN NASIONÁL, Artigu 18 ne’ebé ko’alia kona-bá REKURSU no REKLAMASAUN HASORU REJÍSTU.
Baze bá dadus ne’ebé rejistadu iha Sistema Baze Dadus DNPS nian, Reklamasaun no Kontestasaun hamutuk rihun neen-nulu resin-ida, atus-hitu, sanulu resin-ida (61.711), ne’ebé mak mai hosi Kombatente sira ne’ebé rejistadu iha Primeiru-rejístu 2003 ho 2005 no Segundu-rejístu 2009.
Tuir dadus pagamentu pensaun bá Veteranus hosi 2008 mai to’o 2026, Governu selu tiha ona bá ema hamutuk 44,671 ho kategória Pensaun Sobrevivénsia, Pensaun Subsisténsia ho Pensaun Espesiál Reforma.
Enkuantu, sira ne’ebé simu Pensaun ho kategoria Prestasaun Pekuniária Únika – 3 á 7 hamutuk 25,504, no Sira ne’ebé simu pensaun iha kategória Apoiu Finanseiru Úniku $10 – simu dala-ida de’it, hamutuk 798. Dadus hirak ne’e seidauk inklui Dadus Reklamadus no Kontestadus, tanba iha hela prosesu.
