Passa Férias Iha Terra Natal, Pe. Aventino Hakotu Iis Kauza Hosi Asidente Iha Baucau
Imajem : Frei Padre Aventino Alves Gusmão, ofm.cap
Sapnews Pro, Dili : Hafoin selebra misa agradesimentu saserdotal nian iha nia rai moris fatin Ossu iha misaun nu’udar nai-lulik seidauk to’o fulan ida, Frei Padre Aventino Alves Gusmão, ofm.cap hetan asidente iha area Lanut, postu administrativu Baucau Villa, munisipiu Baucau to’o la konsege salva nia vida.
Tuir publikasaun ne’ebé Sapnews.com asesu liu hosi Berdato Anan dos Santos hakerek katak simu novidade tristeza ne’ebé labele espera.
“Ohin, ha’u simu novidade ida ne’ebé ha’u la espera. Akontesimentu akontece nune’e, no bainhira haree ba ita-nia moto ordenação, ha’u hanoin: talvez Maromak nia dalan la’o liu hosi mapa ne’ebé ita rasik prepara”. Hakerek Berdato Anan dos Santos iha 29/08/2026.
Berdato sublinha, moto ne’ebe Maktoban Pe. Aventino hili katak “Sai husi ita nia rai, husi ita nia família no husi uma aman nian, ba rai ne’ebé Ha’u sei hatudu ba ita.”(Génesis 12,1).
“Ita hili dalan ida, maibé Maromak liu hosi dalan seluk. Ita planeia ida, maibé realidade bele sai diferente. Ita hanoin katak ita hatene fatin ne’ebé ita atu bá, maibé Maromak dehan: “La’os ita mak tenke hatene hotu; importante ita fiar no la’o.”
Iha vida saserdotal, la’os buat hotu sei akontese tuir ita nia planu. Iha tempo balu, ita tenke husu:
“Na’i, agora Ita hakarak ha’u ba ne’ebé?” No resposta dala barak la mai kedas. Maibé ita bele kontinua la’o, tanba missão la depende de’it ba situação ne’ebé ita hakarak, maibé ba fidelidade ita nian ba Cristo.
Nia sublinha buat ne’ebé ohin akontese bele la hanesan ema nia hanoin, maibé ida-ne’e la signifika katak Maromak husik ita. Talvez, iha buat ne’ebé ita seidauk komprende, Maromak nia Providência mak sei kontinua hakerek ita-nia istória.
“Ami hasoru malu iha Eukaristia, iha Eukaristia mos ita aprende katak vida ne’ebé fó ba Maromak tenke prontu simu nia vontade, maski dala ruma nia vontade lori ita ba dalan ne’ebé ita la espera.
Maromak nia dalan la hanesan ita nia planu maibé sempre iha nia graça.”
Frei Pe. Aventino Alves Gusmão, simu ordenasaun saserdotal iha loron 25 fulan Maiu 2025 iha Cabo Verde, durante passa ferias iha Timor-Leste, nia aproveita hala’o mós misa agradesimentu iha loron 15 Agusto 2025, liu tihan loron loron 14, ohin (29/08/2026) hetan asidente ho motor CRF U-6064 iha area Lanut, postu administrativu Baucau Villa, munisipiu Baucau to’o rezulta lakon vida tanba hetan kanek grave.
Maktoban Padre Aventino Gusmão moris iha loron 20 Abril 1985, origem hosi Suku Uabubo, Postu Administrativu Ossu, munisipiu Viqueque, hakotu iis ho idade 41 iha loron 29 Agustu 2026.
