Fo Krisma Ba Sarani 470 ! Dom Leandro Fo Segredu Orgullu Ba Krismadu Sira
Imajem : Bispu Dioseze Baucau Dom Leandro Maria Alves iha Parokia Luro, 13/09/2026
SAPNewsTL, Lautem : Bispu Dioseze Baucau Dom Leandro Maria Alves fo Sakramentu Krisma ba sarani hamutuk 470 iha Paróquia Nossa Senhora Ranha dos Apostolus de Luro, Vigararia Lautém.
Bispu Dioseze Baucau, Dom Leandro Maria Alves hateten, sarani sira tenki hatene perdua malu tanba perdua mak hahalok ne’ebé hatudu domin no laran-luak hanesan Maromak hodi ema bele moris ho hakmatek no kontente hamutuk ho Maromak no maluk sira.
Dom Leandro haktuir, leitura sira iha Domingu XXIV Tempu baibain fó énfaze ba tema perdão no domin Maromak ne’ebé laiha limite.
“Leitura sira apresenta mai ita konaba Maromak ida ne’ebé hadomi sem limite, sem medida. Maromak ida ne’e konvida mos ita, fiar-na’in sira, atu hamoris hahalok ne’ebé hanesan ba ita nia maluk sira ne’ebé loroloron moris hamutuk ho ita.” Dehan Bispu Dioseze Baucau Dom Leandro Maria Alves iha Luro, 13/09/2026.
Nia esplika, moris hakmatek no kontente la depende ba buat materiais ne’ebé ema iha, maibé depende ba laran ne’ebé hatene perdua no la rai ódio ka laran-moras.
”Moris hakmatek no moris kontente ne’e la’ós tan ita iha buat barak ka ita halibur buat oioin, maibé moris hakmatek no kontente ne’e só hetan iha laran ne’ebé hatene perdua.” Dom Leandro haktuir.
Nia argumenta, ema matenek mak ema ne’ebé la husik nia an domina husi hahalok a’at, maibé hatene kontrola an no hatene perdua nia maluk.
“Ema matenek mak ema sira ne’ebé la husik nia an domina husi hahalok a’at sira. Ema matenek mak ema sira ne’ebé hatene perdua nia maluk sira.” Nia Salienta.
Dom Leandro mos liga tema perdão ho orasaun Ami Aman, ne’ebé sarani sira reza loroloron. Nia hateten, iha orasaun ne’e, sarani sira husu perdão ba Maromak no, iha tempu hanesan, promete atu fó perdua ba ema ne’ebé halo a’at ba sira.
”Wainhira koalia konaba perdão, halo ita hanoin kedas konaba oração nebe mak bai-bain hanesan sarani ita reza lor-loron iha ita nia moris: “Ami Aman”. Iha oração ne’e, kuando ita reza ho hakmatek no konsiente, ita dehan: “Haraik perdão mai ami sala nu’udar ami fo perdua ba ema halo a’at ami”. Nia esplika
Nia enfatiza katak perdão ne’ebé sarani husu husi Maromak tenki akompaña ho kapasidade atu perdua ema seluk.
”Hanesan sarani, fiar nain; ita nia deseja mak atu hetan perdão husi Aman Maromak. Maibe, Oração Ami Aman nebe mak ita reza ne’e, fo hanoin ka hanorin mai ita katak perdão ita só hetan wainhira ita hatene perdua. Ita nia Aman iha lalehan, tuir oração Ami Aman nebe mak ita reza ne’e dehan momos ona mai ita katak ita-nia hatene perdua ita-nia maluk sira mak lori mai ita perdão.”
Dom Leandro Subliña, ema ne’ebé hatene perdua sei hetan hakmatek iha nia moris ho Maromak no ho nia maluk sira.
Nia mos refere ba segunda leitura husi São Paulo ne’ebé fó hanoin ba sarani sira katak moris no mate tenki orienta ba Nai.
“La iha ita ida moris ba nia an rasik, la iha ita ida mate ba nia an rasik. Ita moris karik, moris ba Nai; ita mate karik, ita mate ba Nai.” Nia informa.
Dom Leandro argumenta mensajen São Paulo nian hatudu katak sarani sira pertense ba Kristu no tenki moris iha hakmatek no kontente ho Maromak no maluk sira.
“Kristu nia ema sira mak sira ne’ebé moris iha hakmatek no kontente ho Maromak no maluk sira, tanba hatene perdua malu.”
Iha Evangelho, Dom Leandro esplika, Pedro husu ba Jesus kona-ba dala hira mak nia tenki perdua nia maluk sira bainhira halo sala hasoru nia. Jesus hatán, “hitu-nulu dala hitu,” ne’ebé, tuir nia, signifika katak sarani sira tenki perdua nafatin no laiha limite.
Dom Leandro sublinha, Maromak mak Maromak ne’ebé prontu atu perdua, laran-luak no domin-na’in, no sarani sira mos tenki limita hahalok ne’e iha sira nia moris.
“Maromak ne’e perdua-na’in, laran-luak, domin boot, maibé Maromak husu mai ita mos atu sai ema perdua-na’in, domin-na’in hanesan Maromak rasik.” Nia husu
Nia mos hatudu ezemplu husi Jesus Kristu iha kruz, ne’ebé nafatin fó perdão ba ema sira ne’ebé halo a’at ba nia. Nai, perdua sira, tan sira la hatene saida mak sira halo.” Nia haktuir.
Tuir nia, ema ne’ebé hatene perdua mak ema ne’ebé la rai laran a’at ba ema sira ne’ebé halo a’at ba nia, maibé bele reza ba sira.
Ba joven no krismandu sira, Dom Leandro husu atu hatene katak perdão mak hahalok ne’ebé mai husi Maromak no tenki sai parte husi moris sarani.
“Imi Krismandu sira, buka hatene katak perdua ne’e mak hahalok Maromak nian. Ita-nia hamutuk ho Maromak ita hatudu liu husi hahalok perdão.” Nia esplika
Nia apela mos ba joven sira atu hadomi malu, evita violénsia no hahalok a’at iha komunidade.
“Joven sira buka atu hadomi malu, hadomi malu ne’e mak hahalok Maromak nia oan. Imi nudar Maromak oan buka atu moris nudar Maromak oan, haree malu di’ak no hases husi ita nia hahalok violénsia sira.” Dom Leandro husu.
Sakramentu Krisma ne’e realiza kada periodu iha Parokia Luro, misa solenidade ne’e marka etapa importante ida iha moris espiritual no fiar
katóliku sira-nian.
