SEJD Konsidera TL Iha Ona Balansu Ba Desenvolvimentu Desportivu
Imajen Partisipante Simpoziu Nasional iha Timor Plaza Dili,18/11/2022
(SAP News TL) DILI – Konfederasaun Desportu Timor-Leste (CDTL) hamutuk ho politiku, akademista ho federasaun desportivu 35 realiza simpoziu nasional desportu 2022 to tema desportu pasadu, agora no future, Objetivu husi simpóziu ne’e atu promove modalidade desportu ba prestasaun iha kompetisaun internasional sira.
“Dezde inisiu Timor-Leste restaura ninia independensia, ita foin realiza simpoziu nasional desportu ba dahuluk ne’ebe hamutuk ho politiku, akademista, pratikante desportu sira no Federasaun Desportivu 35 hodi bele rona sira nia hanoin oinsa hamutuk dezenvolve federasaun desportivu no CDTL iha Timor-Leste hodi promove federasaun sira no jere federasaun sai diak liu tan ba futuru”, Prezidente CDTL Macario F. Sanches iha nia diskursu, Timor Plaza Komoro, Dili sesta (18/11).
Prezidente akresenta, simpoziu sira realiza para atu hametin ezistensia CDTL hodi kontinua hakbesik modalidade desportu ba publiku atu sai modalidade uniku ne’ebe reprezenta Timor-Leste ba eventu sira nivel internasional
“Atu hametin CDTL, ita hakarak rona pratikante no akademista sira para atu hatene problema no dezafiu ba desportu iha pasadu, agora no futuru nian, simpoziu ne’e atu fo espasu ba ema hotu atu koalia Timor-Leste ba prestasaun ho diak liu, tan ne’e atleta sira hatudu ona prestasaun hodi lori medalla mai Timor-Leste dezde husi tinan 2011 to’o agora iha kompetisaun internasional sira iha rai liur hanesan jogu Sea Games, Asian games no jogu olimpiku sira”.nia sublinha
Iha fatin hanesan Sekretariu Estadu Juventude no Desportu Abrão Saldanha dehan, orgullu boot governu bele partisipa simpoziu ne’e ho tema desportu pasadu, agora no futuru ne’ebe tinan 20 bele halo ona balansu ba dezenvolvimentu desportu tanba rejista ona federasaun desportivu 35 iha Timor-Leste
“Orgullu boot governu bele partisipa simpoziu ida ne’e ho tema desportu pasadu, agora no futuru ne’ebe tinan 20 ona ita bele halo ona balansu ba dezenvolvimentu desportu iha Timor-Leste tanba ita rejista ona federasaun desportivu tolunulu resin-lima(35)”, tenik Abrão
Sekretariu Estadu ne’e hatutan, tinan sanulu ona governu kria utilidade publiku tuir lei diploma ministerial maibe seidauk iha federasaun ida hetan utilidade ida ne’e tanba seidauk priense rekezitu tuir lei diploma ezizi tanba enfrenta problema hanesan federasaun sira foku liu ba alta prestasaun maibe iha futuru mak tenki dezenvolve desportu husi baze liu husi eskola no komunidade para desportu sai kultura ba ema hotu hodi nune’e forte ba prestasaun no tenki muda hanoin desportu ne’e ba jogu deit maibe ne’e moris saudavel nian hotu.
Entretantu iha simpoziu ne’e CDTL konvida orador importante Eis Primeiru Ministru Mari Alkatiri hamutuk ho panelista eis sekretariu Estadu Juventude no Desportu Osorio Florindo da Conceicão ho Miguel Manetelu, Akademista Aurelio Guterres no eis atleta atletizmu Afranio Xavier hodi halo diskusaun koalia desportu pasadu, agora no futuru hamutuk federasaun desportivu 35 maka Automobilizmu, Atletizmu, Aikido, Basketebol, Badminton, Boxe, Billiard, Kanoazen, Siklismu, Kricket, Korrida kuda, Futebol, Fhakuptil, Judo, Karate-Do, Shorinji Kempo, Motosiklismu, Natasaun, Netbol, Sailing, Silat, Sky, Tiru, Taekwondo, Tenis kampu, Tenis Meza, Voleibol, Xadres, Wushu, Muathay, Sepaktakrau, Ramahana, Hockey, Andebol no Teqbol ne’ebe partisipa mos simpoziu ne’e hodi halo expozisaun no atraksaun idak-idak nia federasaun ba publiku hodi kunese sira federasaun.
Reportajen : Augusto dos Santos
Editor : Ekipa Editorial