Atleta Munisipiu 14 Partisipa Jogu Eskolar, SEJD Konsidera Desportu Seida’uk Sai Karreira
![](https://sapnewstl.com/wp-content/uploads/2022/12/Desportu.jpg)
Imajen Atleta Estudante sira husi 14 Munisipiu iha Ginajiu GMT Dili,14/12/2022
SAP News TL, DILI : Sekretariu Estadu Juvetude Desportu (SEJD) realiza jogu desportu eskolar hamutuk ho assosisaun munisipiu sira husi Federasaun Voleibol Timor-Leste (FVTL) no Federação de Timor Atletismo (FTA) ne’ebe partisipa husi atleta estudante sira husi munisipiu 14.
“Ita nia jogu eskolar nivel nasional 2022 realiza husi FVTL ho FTA hamutuk ho SEJD ne’ebe ho tema dezenvolve desportu eskolar nivel nasional ba prestasaun, ita nia atleta estudante sira feto mane mai husi munisipiu 14 Lautem, Baucau, Manatuto, Viqueque, Dili, Aileu, Ainaro, Manufahi, Covalima, Ermera, Liquisa, Bobonaru, Atauru no RAEOA hamutuk nain-336 husi modalidade voleibol no atletizmu ne’ebe durasaun ba kompetisaun ne’e lao durante loron sanulu komesa 14 fulan dezembru to’o 26 fulan dezembru 2022”, dehan prezidente komisaun Inocencio Araújo ba jornalista sira liu husi diskursu iha Jinajiu Desportu Caicoli, Dili kuarta (14/12)
Prezidente ne’e akresenta, atividade ne’e realiza tanba asosiasaun voleibol no atletizmu iha munisipiu 14 servisu hamutuk ho edukasaun munisipiu no autoridade munisipiu sira ne’ebe kustu gasta apoiu ba eventu ho orsamentu montante 146,375.50 USD mai husi SEJD maka ba kustu material ho ekipamentu eskritoriu montante 1, 576 USD, konsumu 40, 058.50 USD, transporte 20,056 USD, akomodasaun 58,800 USD, premiu 7,450 USD, profesional fee ba atletizmu, voleibol no sekretariadu 4,835 USD, material no ekipamentu seluk 13,200, kustu ba mediku 200 USD no komunikasaun 200 USD no komisaun mos hakarak husu ba atleta sira ho treinador nafatin mantein dixiplina iha jogu atu nune’e bele hasa’e valor desportu no bele rekruta sira tanba sira mak fini ba prestasaun iha futuru
Iha fatin hanesan SEJD Abrão Saldanha agradese ba federasaun voleibol no atletizmu ne’ebe hamutuk ho governu organiza eventu ne’ebe partisipa husi munisipiu 14, atleta estudante husi munisipiu sira fini ba prestasaun
“Ha’u hakarak agradese ba federasaun voleibol no atletizmu organiza eventu jogu eskolar nivel nasional 2022 ne’ebe partisipa husi atleta diak sira mai husi munisipiu 14, baze desportu ida mak mai husi eskola sira ne’ebe ita bele hetan fini diak ba selesaun nasional iha futuru maski desportu iha Timor-Leste agora ita hotu hatene seidauk sai kareira maibe adisional maibe bainhira atleta sira hetan prestasaun iha kompetisaun internasional”, tenik SEJD
Abrão hatutan, kompetisaun laos atu buka deit manan nain tanba ne’e rezultadu maibe iha kompetisaun ne’e amizade mak importante ne’ebe harahun ona diferensia sira
Iha sorin seluk, treinador voleibol Munisipiu Lautem João da Costa haktuir, Jogu eskolar tinan ne’e la’o kapas tebes tanba mai husi munisipiu hodi kompete iha nasional
“Kapas tebes tanba atleta estudante sira husi munisipiu mai iha nasional kompete iha jogu eskolar iha tinan ne’e, ami kada munisipiu mai ho atleta voleibol feto mane 18 ho atletizmu nain rua hamutuk ofisial ho treinador nain haat no tinan ida ne’e kapas ona SEJD tau hotu atleta husi munisipiu sira iha hotu hotel ne’ebe foin ba dahuluk iha Timor-Leste ami hein katak tuir mai sei diak liu tan”, João hateten
Enkuantu atleta husi munisipiu Viqueque Fatima Soares Alves informa, nia sente kontente partisipa eventu ne’e no sai manan nain daneen iha modalidade atletizmu 5 km
“Ha’u sente kontente tanba ami halo selesaun iha munisipiu mak mai partisipa eventu nasional ida ne’e, entre ami atleta barak tebes, ohin loron ha’u sai manan nain daneen iha modalidade atletizmu 5 km, entaun, ha’u mos esforsu an nafatin iha eventu tuir mai sei sai manan nain datoluk ka dahaat tanba nu’udar atleta tenki treinu nafatin”, tenik Fatima
Enkuantu, Atleta ne’e mos husu foinsa’e sira atu la baruk no moe hodi desenvel modalidade desportiva sira iha Timor Lest
Reportajen : Augusto dos Santos
Editor : Ekipa Editorial