Presu Sasan Hotu Sa’e, FONGTIL Konsidera Governu Falta Atensaun Ba Povu
Protokolu Ofisial Advokasia FONGTIL Jorge Madeira iha salaun FONGTIL Caicoli, sexta (13/01/2023).
SAPNewsTL, Dili : Relasiona ho folin sasan ne’ebe hahu sa’e iha territoriu nasional, Forum Organizasaun Naun – Governamental Timor-Leste (FONGTIL) husu governu hodi halo kontrolu masimu ba sasan folin sa’e iha merkadu, labele fo espasu ba faan nain sira halo manipulasan folin ba produtu importasaun sira.
“Ita nia governu tenki kontrola maximu ba sasan folin sa’e iha merkadu sira atu nune labele fo espasu ba faan nain sira labele aproveita situasaun sira hanesan ne’e, bainhira la iha informasaun husi ita nia governu”, dehan Protokolu Ofisial Advokasia FONGTIL Jorge Madeira liu husi konferensia imprensa ba jornalista iha salaun FONGTIL Caicoli, sexta (13/01/2023).
Jorge, hatutan iha semana ne’e nia laran komunidade barak mak preokupa tebes folin nesesidade baziku iha merkadu nasionál sira, tanba realidade hatudu katak iha lei Orsamentu Jeral Estadu tinan 2023, governu hasa’e taxa ba kualkér produtu importasaun ne’ebé tama Timor-Leste ne’ebe taxa Aduaneiru importasaun sa’e husi 2.5% ba 5% katak kualkér sasán kona hotu taxa 5% maibe ministeriu finansa Lahatete, Ministru Finansas hatete de’it taxa sa’e ba item 4 de’it, maibé realidade iha OJE 2023 governu aplika hasa’e taxa ba item 8, aleinde taxa Aduaneiru importasaun
Nia informa, governu hasa’e taxa ba produtu 8 hanesan masin midar kona taxa $ 1 por kg, Bee minerál sei kona taxa $ 3 por litru, Serveja sei kona taxa $ 2.7 por litru, Tua Alkool liu porsentu 4,6 sei kona taxa $ 4.5 por litru, Tinto sei kona taxa $ 4.5 por litru, Tabaku sei kona taxa $ 100 por kg, Kareta sei kona taxa 10 % to’o 30 % husi folin, Kilat tiru manu sei kona taxa 10 % husi folin maibe governu liu husi ministeriu finansa dehan buat seluk, lei OJE 2023 hatete buat ketak ida, naturalmente projetu lei OJE ne’e prepara husi ministériu finansa, maibé sira lahatene katak governu hasa’e taxa ba produtu 8 no hasa’e taxa Aduaneiru importasaun
Protokolu ne’e afirma, hasa’e taxa ba sasán hotu, signifika governu ida ne’e la fó ona valór ba povu no governu ida ne’e hanoin – an de’it, hanoin sira nian perdiem de’it, hanoin sira nia vensimentu de’it no hanoin fasilidade ba sira de’it, ba sira nia futuru no sira nia jerasaun maibe la tau atensaun ba povu ne’ebé sira ukun hela
Jornalista : Marcela Lemos