Professor Tanis Tan Hanorin Tinan 15 Naran La Sai, PN Husu MEJD Responsabiliza
![](https://sapnewstl.com/wp-content/uploads/2023/03/Verdial.jpg)
Imajem Deputadu Antonio Verdial, Atual Presidente Komisaun Trata Edukasaun
SAPNewsTL, Dili: Deputada Bankada KHUNTO Antonio Verdial no Deputada Bankada FRETILIN Maria Rangel husu Ministériu Edukasaun Juventude no Desportu (MEJD) atu responsabiliza problema profesor sira iha territoriu Timor-Leste tanba profesor barak la satisfaz ho desizaun ministeriu nian ne’ebe profesor balun voluntariu tinan barak nia laran naran la sai
“Informasaun husi ema balun, ha’u rona katak MEJD hatama naran iha lista ne’e, ema balun hanorin iha tinan kleur los ona naran la tama fali iha lista fo sai iha jornal republika ne’e maibe sira nunka hanorin mak sai, husi profesor kontratadu sai ba profesor permanente, husu MEJD atu responsabiliza ba problema profesor sira ne’e maibe situasaun ne’ebe profesor sira iha Timor-Leste laran tomak hasoru ne’e ha’u atu hatete katak ne’e kompetensia exkluziva oitavu governu konstisional espesial ba MEJD nian”, dehan Deputadu Antonio Verdial ba jornalista sira iha uma fukun Parlamentu Nasional Dili (27/02/2023).
Antonio hatutan, iha semana kotuk iha Munisipiu Ainaru nia hetan informasaun husi responsabel edukativa munisipiu Ainaro nian katak iha eskola balun profesor kontratadu ne’ebe hanorin kleur ona, sira lori kalen ba taka tiha eskola la fo oportunidade ba estudante sira partisipa ensinu aprendizajen iha sala laran rezulta husi naran sira ne’ebe fo sai iha jornal republika tanba sira rona katak governu halo ona investigasaun ba naran hirak ne’ebe tama iha lista hodi fo sai iha jornal republika.
Nia aumenta tan, ohin dader foin rona mos informasaun husi Postu Administrativu Cailaco, profesora ida telefone direita ho tanis dehan nia hanorin durante tinan sanulu resin lima ona, agora nia fatin ne’e troka fali ema ida mak durante ne’e objek hela.
Iha fatin hanesan, Deputada Bankada Fretelin Maria Rangel hatete, relasiona ho naran professor sira liuliu iha Munisipiu Viqueque la sai iha jornal republika ne’e husu ba MEJD responsabiliza atu nune’e labele mosu dezentendimentu entre profesor sira.
“Relasiona profesor sira naran la sai liu liu iha suku Boilale iha Munisipiu Viqueque iha eskola ida profesor voluntariu nain ualu laiha ema ida naran tama, tan ne’e ha’u husu ba MEJD responsabiliza atu labele iha dezentendimentu entre ita nia profesor sira tanba ita nia oan sira prezisa eskola, sei professor sira ne’e mak la tama hotu sai nafatin voluntariu hotu entaun eskola ne’e se mak hanorin tanba nain ualu ne’e voluntariu nunka ida pasa iha selesaun ne’ebe fo sai iha jornal republika”, tenik Maria
Maria akresenta, Iha munisipiu Viqueque iha eskola ida profesor voluntariu nain ualu laiha ema ida naran tama, depois rona informasaun fila fali husi dirijente edukasaun munisipiu ne’e katak naran ne’e haruka mai nasional mak hasai sira nia naran, tuir lolos iha eskola ida ne’e ema nain ualu ne’e balun liu karik laos hotu ba tanba durante sira nia dedikasaun iha eskola ida ne’e, iha nasional hasai sira nia naran ne’e la hatene razaun fundamental ne’e saida.
Jornalista : Ermelinda Soares