Dalan Ba Manan Diabu Nia Ukun Iha Kuaresma, Keta Haluha Konfesa

Imajem : Vencensio Guterres, Atual Estudante Universidade Nasional Timor Lorosa’e (UNTL), Fakuldade Medisina Siensia Saude, Departamentu Medisina Jeral

SAPNewsTL, Dili : Foinsa’e Vincensio Guterres konsidera Kuaresma hanesan oportunidade ba ema sarani katólika hodi hafoun an moris tuir maromak liafuan no ukun fuan

“Kuaresma katak loron 40, Ita prepara an hodi tama ba iha mistériu paskua, tanba kuaresma nu’udar oportunidade ida ne’ebé mak ita hafoun ita nia-an hodi moris tuir Maromak nia hakarak, Kauresma hahú husi kuarta feira sinjas to’o kinta feira santa iha ne’ebé hahú kedan husi ita simu akudesan nu’udar konvite ida mai ita atu halo transformasaun ba ita nia-an iha vida espiritual”. Tenik Vincensio Guterres ba SAP News TL iha villa Verde, 22/03/2023

Estudante Universidade Nasional Timor Lorosa’e (UNTL), Fakuldade Medisina Siensia Saude ne’e akresenta, Wainhira Jesus han dala ikus ho nia apostulu sira, Fórmula impozisaun akudesan nian katak “Ita simu inspirasaun husi Sagrada Eskritura (Gn 3, 19: “Ó mai husi rai-rahun no sei fila ba rai-rahun” no Mc 1, 15: “Hakribi salan no fiar Evanjellu)”

Nia fundamenta, loron kuaresma momentu sertu ne’ebe fanun sarani sira halo penitensia, jeju no no abstinénsia

“Kuaresma nu’udar tempu sertu hodi ema hotu halo Peniténsia, Jejun no Abstinénsia hodi konverte ita nia-an husi moris atan ba diabu no sai fali moris nu’udar Maromak oan ne’ebé nakonu ho santidade, tan ne’e Ita tenke halo arrependementu ba sala sira ne’ebé mak ita halo kontra nain Maromak nia ukun hanorin no halo reflesaun ba ita nia moris tuir lialoos”. Dehan Vincensio

Estudante Medisina Jeral UNTL ne’e salienta, “Oinsá mak ita bele konverte nia-an?  Atu konverte ita nian an mak ita presiza liu atu halo jejúm, orasaun no karidade, hahalok tolu ne’e ita haree simples maibé todan atu ema halo no se mak halo duni hahalok tolu ne’e ho intensaun ne’ebé mak di’ak signifika nia hetan ona vitória ba funu espiritual nian”. nia hatete

Joven Baukau oan ne’e mos husu ba ema hotu hodi halo konfesaun no hadia an iha tempu kuaresma nia laran molok tama ba semana santa

“Ha’u nia mensagen ba sarani hotu iha mundu ida ne’e mak keta haluha konfesa ita nia sala no halo arrependementu ba ita nia hahalok aat iha loron kuaresma basá ne’e momentu oportunu ida ne’ebé ita halo foun ita nia moris no Maromak kontente liu ho ema ne’ebé mak la’o sala ona dalan maibé ikus mai nia fila fali ba Maromak”. Nia hakotu

Enkuantu, semana santa sei hahú iha loron 2 fulan abril (Domingo Ramos) to’o loron 9 Fulan Abril rua mai

Jornalista : Marcela Lemos