Aban, ME Realiza Ezame Nasionál ! Estudante Lasama Luro Prontu 100%

SAPNewsTL, Lautem – Eskola Sekundaria Jeral Fernando Lasama Luro estudante hamutuk atus ida tolunulu resin rua (132) prontu ona no preparadu hodi tuir ezame nasional.

Tuir Diretor Eskola Sekundaria Jeral Fernando Lasama Luro Tomas Mouzinho hateten sira halo ona preparasaun ba ezame nasional durante semana rua no hein atu realiza iha segunda oin mai.

“Ami halo preparasaun durante semana rua nia laran husi forma komisaun organizadora hodi organiza ezame nasional ne’e, hahu prepara sala de aula, kartaun ezame, oráriu ezame no estudante sira komesa haree no hatene ona nia sira nia numeru ezame no sala ida-idak, hein realiza”. Dehan Diretor ESG Fernando Lasama Luro Tomas Mouzinho iha Edifisiu ESG Lasama Luro, Sabadu 12/10/2024

Diretor ne’e informa estudante sira ne’ebe preparadu atu tuir ezame nasional hamutuk atus ida tolunulu resin rua husi programa Siensia Teknolojia no Siensia Sosiais.

“Ba estudante 12 ano ne’ebe agora daudaun prepara hela ba ezame nasional hamutuk atus ida tolu nulu resin rua (132), ba Programa Ciencia Tecnologia nia total limanulu resin rua (52) kompostu husi feto hamutuk haatnulu resin rua no mane hamutuk sanulu nomos, enkuantu, Programa Ciencia Sosiais Humanidade hamutuk ualunulu (80), feto hamutuk tolunulu no mane hamutuk limanulu”. Tenik Diretor

Diretor Tomas mos fundamenta sira mos hala’o ona missa agradesimentu ba finalista sira tuir orientasaun husi Sekretariu Estadu, nune’e hein realiza ezame iha Segunda.

“Ami mos simu orientasaun husi Sekretariu Estadu Ensinu Sekundaria Jeral no Tekniku Vokasional fo orientasaun ba eskola hotu-hotu atu halo’o missa agradesimentu ba estudante finalista sira no ohin ami realiza ona missa agradesimentu ida ne’e”. Tomas haktuir

Tomas mos husu ba estudante sira atu prepara an no estuda didiak hodi bele hetan rezultadu ne’ebe diak.

“Husu ba estudante sira liuliu 12° ano sira tenke prepara no estuda didiak tanba durante tinan tolu nia laran imi esforsu ne’e, imi determina iha loron haat ne’e, ha’u atu fo hanoin katak tenke estuda didiak, nune’e nia rezultadu sai di’ak, garantia katak imi sei bele responde pergunta sira ne’ebe imi hetan iha ezame nasional”. Nia hameno

Entretantu, professor vizilante ne’ebe atu fo vizilansia ba ezame nasional ne’e hamutuk sanulu resin hitu ne’ebe hetan ajuda mos husi EBC Luro.

Enkuantu, total estudante husi Eskola Sekundaria Jeral Fernando Lasama Luro hamutuk atus haat neennulu resin hitu ne’ebe kompostu husi feto hamutuk atus rua limanulu resin ida no mane hamutuk atus rua sanulu resin neen.

Jornalista: Leonel Alves & Sandra de Jesus