Abril 2025, PD Sei Realiza Kongresu Nasionál Ho Kualidade
Imajem : Prezidente Partidu Demokrátiku Mariano Assanami Sabino hamutuk ho Prezidente CPN Adriano Loromau do Nacimento iha Salaun Laline Larigutu CNE, 09/11/2024
SAPNewsTL, Díli – Liu hosi sesaun plenária, Konsellu Polítiku Nasional Partidu Demokrátiku (PD, sigla Portugés) aprova ona kalendáriu ba loron mini kongresu postu administrativu, konferénsia munisipal no kongresu nasionál.
Prezidente CPN Adriano do Nascimento anunsia katak Konsellu Polítiku Nasional (CPN) aprova kalendáriu kongresu, hafoin konsellu ezekutivu nasional Partidu Demokrátiku aprezenta iha plenária.
Sesaun plenária ne’ebe Partidu Demokrátiku hala’o membru Konsellu Polítiku Nasional (CPN) maioria ho votus afavor haatnulu resin-lima (45), kontra ida (1) no abstensaun ida (1).
“Ohin membru CPN maioria fó votus afavor 45, kontra ida no abstensaun ida hodi aprova rezolusaun, Partidu Demokrátiku sei halo kongresu nasional iha loron 19 to’o 20 fulan Abril 2025”. Dehan Prezidente CPN Adriano do Nascimento liu hosi komunikandu imprensa iha Salaun Lalini Larigutu CNE, Díli 09/11/2024.
Prezidente CPN hateten, antes halo kongresu nasional Partidu Demokrátiku sei halo konferensia postu administrativu no konferensia munisipal.
“Antes halo kongresu nasional sei halo konferensia postu administrativu ne’ebe hahu iha loron 14 dezembru 2024 to’o loron 23 fevereiru 2025”.
“Hafoin halo konferénsia postu administrativu, maka sei hakat ba konferénsia munisipal ne’ebe sei hahu iha dia 18 janeiru to’o 15 marsu 2025”. Nia hatutan.
Adriano Loromau informa, PD mos sei halo kongresu ba organizasaun masa Partidu Demokrátiku hanesan Organizasaun Juventude Demokrátiku (OJE), Organizasaun Muller Demokrátiku (OMD) no Movimentu Profisional Demokrátiku (MPD) iha loron 22-30 Marsu 2025.
“Aleinde ida ne’e sei halo mos kongresu ba organizasaun masa Partidu Demokrátiku hanesan organizasaun juventude Demokrátiku, muller Demokrátika no profisional Demokrátiku, orgaun hirak ne’e mos sei halo nia kongresu iha loron 22 to’o 30 fulan marsu tinan 2025”. Nia subliña.
“Nune’e Konsellu Polítiku Nasional fó fiar ho kompetensia tomak ba Konsellu ezekutivu nasional hodi implementa rezolusaun CPN Partidu Demokrátiku nian iha teritóriu Timor-Leste”. Hakotu Prezidente CPN.
Prezidente PD Mariano Assanami Sabino hateten kongresu ne’ebé sei realiza
“Ita hakarak halo kongresu ne’ebé kualidade iha desizaun hodi deside futuru Partidu Demokrátiku, ema ne’ebé hetan konfiansa hosi postu no munisipiu maka tuir kongresu nasional, kongresu postu no munisipiu importante no save hodi konsolida no hatur ita nia existénsia, review no reforsa instituisaun tanba ita sei hasoru dejafiu boot iha tinan 2028”.hateten Assanami
Kongresu refere hetan partisipasaun maksimu hosi membru konsellu politiku nasional, estrutura ezekutivu munisipal no nasional.
Jornalista : Marciana da Conceição